Flakët jashtë kontrollit në Rodos, evakuuohen 30 mijë persona

Në Rodos zjarri ka djegur një sipërfaqe të madhe pylli, duke shkatërruar edhe hotele luksoze, si dhe shumë banesa.

“Zjarri që po shkatërron ishullin është ende jashtë kontrollit”, raportojnë mediat greke, pasi ditën e djeshme autoritetet evakuuan 30 mijë persona, nga të cilët 2 mijë u desh të transportoheshin nga plazhet me anije.

Zjarri ka djegur një sipërfaqe të madhe pylli, duke shkatërruar edhe hotele luksoze, si dhe shumë banesa. Ndërkohë vijon puna e zjarrfikësve të angazhuar në vijën e parë kundër temperaturave të larta dhe erërave të forta.

Mbrëmë janë evakuuar zonat Massari, Malonas dhe Haraki. Qytetarët ftohen me një mesazh 112 të lëvizin drejt qytetit të Rodosit. Në evakuim ndihmuan tre anije të rojes bregdetare, një varkë e gjatë e ushtrisë, një varkë fryrës e Forcave Speciale dhe 30 varka me vela private. Kompania private e transportit Blue Star ka ofruar një nga anijet e saj për të pritur disa nga personat e zhvendosur.

Ministria e Jashtme greke ka hapur një njësi krizash në Athinë për të lehtësuar riatdhesimin e turistëve të huaj. Sot në Greqi priten temperatura mbi 44 gradë.