“Akte të shenjta të historisë së përbashkët”, Osmani uron 109-vjetorin e Pavarësisë

Presidentja e Kosovës, Vjosa Osmani ka uruar shqiptarët me rastin e 109-vjetorit të festës së Pavarësisë. Përmes një postimit në Facebook, Osmani shkruan se më 28 nëntor të vitit 1912, populli shqiptar kurorëzoi aspiratën për Shqipërinë e pavarur.

Sipas Osmanit, ky akt së bashku me ngritjen e flamurit në Vlorë janë akte të shenjta të historisë sonë të përbashkët, të cilën e ndërtuam me mund dhe sakrifica.

“Më 28 nëntor të vitit 1912, populli shqiptar e kurorëzoi aspiratën për Shqipërinë e pavarur. Ky akt së bashku me ngritjen e flamurit në Vlorë janë akte të shenjta të historisë sonë të përbashkët, të cilën e ndërtuam me mund dhe sakrifica. Kjo datë ka shumë peshë historike. Në këtë ditë ka lindur komandanti legjendar Adem Jashari dhe po në këtë ditë, Ushtria Çlirimtare e Kosovës u paraqit për herë të parë publikisht. Të dy këto ngjarje i japin edhe më shumë kuptim nëntorit, sepse bartin në vete frymën e lirisë, idealin e brezave që nga Skënderbeu, Ismail Qemajli, Isa Boletini e shumë patriotë të tjerë”, shkruan Osmani.

Në përfundim të statusit të saj, ajo shton se në 109-vjetorin e pavarësisë, uron që Shqipëria krahas Kosovës të ketë sukses në të gjitha fushat.