Dinamo e Tiranës (ose Dinamo City) po zhvillon përgatitjet e fudnit në prag të startit të sezonit në Kategorinë Superiore. Të sapo ngjitur në elitë, kryeqytetasit kanë objektiva madhorë.
Trajneri i Dinamos, Dritan Mehmeti, ka thënë pas miqësores së djeshme se skuadrës së tij i duhen patjetër dy mesfushorë qendre, dy lojtarë anësorë dhe një sulmues për t’u kompletuar.
“Jemi në kulmin e fazës përgatitore dhe normalisht që muskujt e lojtarëve janë të ngarkuar. Ekipi ka marrë shumë ngarkesa dhe mendoj që nuk jemi futur ende në ritmin e duhur.
Ne presim ende 4-5 elementë që bëjnë diferencën. Kemi probleme në qendër dhe në linjat anësore.
Presidenti po bën përpjekje për të afruar lojtarë që i përshtaten filozofisë së Dinamos.
Na duhen ende lojtarë dhe besoj se jemi pak të vonuar, por shpresoj që të konsolidohemi shpejt.
Objektivi ynë është konsolidimi i grupit, pasi jemi në një fazë tranzicioni.
Kemi pasur shumë hyrje dhe dalje, prandaj duhet të tregohemi më të kujdesshëm.
Presim elementë që të na japin më shumë siguri, një numër 6 dhe një numër 8, por edhe dy lojtarë anësorë dhe një sulmues.
Më pas do të shohim dhe të përcaktojmë objektivat”, deklaroi Mehmeti për “Panorama Sport”.
Discussion about this post