Pasi u transferua vetëm disa ditë më parë nga Lazio drejt Al-Hilalit saudit, për vlerën e 40 milionë eurove, Sergej Milinkovic-Savic ka thënë ditën e sotme dhe fjalët e para si lojtar i arabëve.
Në një deklaratë zyrtare për punëdhënësin e tij të ri, Milinkovic-Savic ka shpjeguar gjithçka sa i përket transferimit, i cili ndodhi shumë shpejt. Përveç transferimit, “ylli” serb foli dhe për skuadrën e tij të re, si dhe për pritjen e bërë nga tifozët.
“Gjithçka filloi gjatë pushimeve. Agjentët e mi më njoftuan për ofertën e Al-Hilal. Të them të drejtën fillimisht nuk dija si t’i përgjigjesha, por më pas u informova dhe vendosa të pranoja. Më duhej një ndryshim dhe ja ku jemi.
Al-Hilal? Është një skuadër shumë e mirë, me traditë dhe që luan për trofe. Më parë ne erdhëm këtu për të luajtur Superkupën e Italisë (2019) dhe u stërvitëm në stadiumin e Al-Hilal, isha në dijeni të skuadrës edhe përpara ofertës. Këtu kam kujtime të bukura sepse atë edicion triumfuan me Lazion.
Unë jam këtu për të ndihmuar skuadrën që të përmbushë objektivat dhe natyrisht dua edhe të rritem më shumë personalisht. Pritja? Shumë tifozë më kanë shkruar në rrjetet sociale, jam shumë i lumtur me këtë pritje”,- u shpreh Milinkovic-Savic.
Duhet thënë se paga gjigande ka luajtur një rol thelbësor, për pranimin e ofertës saudite, nga ana e serbit, duke parë që në një moshë kaq të re, Sergej ka pranuar të emigrojë drejt Lindjes së Mesme, në vend se të synonte një hap të madh në karrierë drejt ndonjë elitar europian.
Discussion about this post