Riqui Puig, futbollist i dalë nga akademia e Barcelonës, nga i icli pritej një karrierë shumë e sukseshme, ka folur për “Catalan Sport” për kohën që ka kaluar në këtë klub dhe konkretisht i është referuar trajnerit Xavi Hernandez, për të cilin thotë se nuk e donte në këtë skuadër.
Puig u konsiderua si një nga talentet më të mëdhenj të shkollës së famshme të futbollit të Barcelonës, La Masia, dhe largimi i tij në MLS, ku aktualisht luan për ekipin e Los Angeles Galaxy, ishte një surprizë e madhe.
Megjithatë, ai thotë se nuk ishte rehat në Barcelonë, as në fushë e as jashtë saj.
“Trajneri më ftoi dhe menjëherë e kuptova se stili i tyre i lojës do të më përshtatej. Nuk isha rehat në Barcelonë as në fushë as jashtë saj, kishte shumë gjëra që nuk më pëlqenin. Vërtetë, futbolli është ndryshe në Spanjë sesa në SHBA, sepse lojtarët më të mirë në botë luajnë në Spanjë”, tha Puig dhe më pas pranoi sinqerisht:
“Por mua më pëlqen këtu. Jam shumë i lumtur me vendimin për t’u larguar nga Barcelona dhe për të ardhur në MLS”.
Futbollist spanjoll ka bërë gjithsej 57 paraqitje për ekipin e parë të Barcelonës dhe thotë se e ka pasur të vështirë të jetojë me presionin e publikut, pasi nuk ka mundur të shkojë në asnjë restorant apo kafe i qetë, si për shkak të mediave dhe për shkak të fansave. Në MLS, thotë ai, nuk ka një presion të tillë.
Pas kësaj ai tregoi arsyen pse u largua nga Barcelona dhe fajtori kryesor ishte trajneri Xavi Hernandez.
“Mendova se me Xavi-n ishim si familje. Në fund të sezonit, u ulëm dhe ai më tha se nuk i llogariste shërbimet e mia. Ndoshta presidenti mendoi ndryshe, sepse ai tha se unë isha një lojtar me një të ardhme të madhe dhe ai donte që unë të qëndroja, por unë kurrë nuk do të qëndroja në një klub ku trajneri nuk më donte.
Është e vërtetë që nuk më trajtuan mirë: nuk më lejuan të stërvitesha me ekipin e parë, por kisha kontratë dhe nuk mund të më ndalonin. Kjo është ajo që më shqetësoi më shumë. Kështu që shpejt vendosa dhe gjeta një rrugëdalje”, shpjegon Puig.
Më pas ai tha se familja e tij dhe familja e Xavit kishin një marrëdhënie të mirë, por trajneri i sotëm i Barcelonës e lëndoi edhe si lojtar edhe si mik.
“Familja ime dhe e Xavi-t kishim një marrëdhënie të mirë. Por ai më lëndoi edhe si lojtar dhe si mik. Ndonjëherë ndodh që nuk ia del mbanë nën drejtimin e trajnerit, por më shqetësoi shumë që nuk më lejuan të stërvitesha në fillimi të përgatitjeve”, ka thënë mesfushori.
Në total, Puig ka luajtur 36 ndeshje për Los Angeles dhe shënoi shtatë gola dhe regjistroi gjashtë asistime. Sa i përket Barcelonës, ai ka luajtur gjithsej 57 ndeshje në këtë ekip dhe ka shënuar dy gola me tre asistime.
Discussion about this post