Ilir Zyba Shehi, shqiptari 48-vjeçar, i cili vrau me sopatë fqinjën e tij, është marrë në pyetje nga hetuesit e Roveretos, për të hedhur më shumë dritë mbi krimin e rëndë. Ai akuzohet se masakroi me sopatë fqinjën e tij, Mara Fait 63 vjeç, pas disa sherresh e tensionesh që kishin, lidhur me jetesën në të njëjtën godinë.
Mediat italiane kanë zbardhur detaje mbi dëshminë e dhënë nga shqiptari, i cili para hetuesve ka treguar pendesë të thellë lidhur me krimin.
”Ajo po ulërinte, siç bënte gjithmonë, më pas nuk mbaj mend asgjë”, mësohet të jetë shprehur Ilir Zyba Shehi, para hetuesve.
Sipas asaj që shkruajnë mediat fqinje, e gjithë dëshmia e tij ishte në lot për shkak të pendesës së thellë që ai ka shfaqur për krimin e rëndë.
Shehi pranoi raportin e vështirë me fqinjen e shtëpisë, më pas episodin tragjik të së premtes. Gjithçka ndodhi rreth orës 20:00 të mbrëmjes, kur shqiptari me sytë e errësuar e goditi gruan me sëpatën që po përdorte për të bërë punë rreth shtëpisë.
Megjithatë ende nuk ka detaje për rrethanat që çuan në vrasjen, për të cilën 48-vjeçari thotë se nuk mban mend asgjë.
“M’u errësuan sytë”, ka përsëritur ai disa herë para autoriteteve.
Ai ka kujtuar të gjitha denoncimet mes familjes së tij dhe atë të fqinjes. Në rastin e Shehit çështjet ishin mbyllur, ndërsa Mara Fait duhet të dilte para gjykatës pas disa muajsh, për akuzën e plagosjes së bashkëshortes së shqiptarit.
Një seancë kjo, që sigurisht tashmë nuk do të mbahet.
Nga denoncimet mes dy fqinjëve të shtëpisë dalin fyerje, kërcënime, provokime, video të regjistruara me telefon për të provuar të drejtën e secilit, megjithatë tani akuza më e rëndë është ajo e vrasjes me dashje, që rëndon mbi 48-vjeçarin shqiptar.
Discussion about this post