Partizani ka bërë detyrën me sukses, duke mos lënë asnjë hapësirë për surpriza në duelin e vlefshëm për turin e dytë të Europa Conference League, përballë klubit nga Andorra, Atletik Eskaldes.
Kampionët e Shqipërisë, triumfuna me shifrat 4-1, përballë një kundërshtari modest, që kishte ardhur ama, në Tiranë, me pretendime madhore.
Duhet theksuar se në fillimin e takimit, Partizani rrezikoi të pësonte golin e barazimit të rezultatit global, por sulmuesi i Atletik, gaboi me portën e boshatisur, duke mos shënjestruar kuadratin.
Ky rast, e zgjoi pak Partizanin, me të kuqtë e kryeqytetit që filluan të sulmonin më shumë portën e mbrojtur nga Saul. Pas disa rastesh të humbura, vendasit zhbllokuan sfidën, duke realizuar falë Tedi Carës (28’). Pas këtij goli, me rezultatin global 2-0, Partizani e kishte më të lehtë për të administruar lojën, me Atletik që nuk ishte mjaftueshëm i fuqishëm për të bërë ndonjë surprizë të hidhur.
Pjesa e parë u mbyll në mënyrën më të bukur, me Carën, që falë një aksioni të bukur personal, realizoi një super gol, duke bërë që tifozët e pranishëm në “Air Albania Stadium”, të duartrokisnin për kryeveprën e beniaminit të tyre.
Në fraksionin e dytë të lojës, nuk kishte vend për shumë histori, me Partizanin që kompletoi ndeshjen, fillimisht, me golin e tretë të takimit, të shënuar nga Rrapaj, falë një asistimi të Carës.
Në fund pati kohë dhe për 2 gola, Eskaldes realizoi fillimisht golin e nderit, falë penalltisë të transformuar në gol nga Lopes. Në aksionin pasardhës Grezda i vuri kapakun sfidës me golin e katërt të takimit për Partizanit
Me këtë fitore, Partizani, siguron një vend për në turin e tretë kualifikues të Conference League, atje ku do të ndeshet me letonezët e Valmiera./m.b /gijotina.com
Discussion about this post