Bayern Mynih ka kaluar një pjesë të parë të vitit 2023 mes shumë komplikimesh, pasi kreu ndryshime të mëdha, që nisën me largimin e trajnerit Julian Nagelsman, e më pas të drejtuesve të rëndësishëm siç ishin Oliver Kahn dhe boshnjaku Hasan Salihamixhiç.
Pikërisht lamtumira e ish-portierit të Kombëtares gjermane ishte ajo më problematikja, pasi palët pranuan se nuk ishin ndarë shumë butë. Në telefonatën e Oliver Kahn me presidentin e klubit, kishte “plasur ferri”, me fyerjet e akuzat, duke bërë që ai të mos ishte i pranishëm as në ndeshjen e fundit të kampionatit kur ekipi fitoi titullin kampion, i ndihmuar nga “gafat” e BVB Dortmund, në sfidën përballë Mainz.
Por me sa raportohet, paraja shëron çdo plagë e kështu, “paqja” është gjetur në momentin kur Kahn i është garantuar se do të përfitojë ekonomikisht nga prishja e parakohshme e kontratës së tij me bavarezët.
Sipas mediave në Gjermani, Kahn do të përfitonte 6 milionë euro në kontratën që e lidhte me klubin deri më 31 dhjetor 2024. Pas një takimi mes palëve gjatë verës, është gjetur akordi dhe tashmë ai do të paguhet 4-5 milionë euro si dëmshpërblim për ndërprerjen e saj para afatit të caktuar.
Këtë e konfirmoi edhe presidenti Herbert Hainer, i cili theksoi se gjithçka ishte mbyllur në “mënyrë miqësore”.
Discussion about this post