Nga Berati ku zhvilloi një takim me strukturat drejtuese të Policisë së Shtetit, ministri i Brendshëm, Taulant Balla, paralajmëroi se vetëpastrimi i policisë është një proces që po hyn në një fazë të re.
Balla foli për krijimin e frymës në një skuadër, ndërsa shtoi se çelësi i suksesit mbetet ndershmëria në rradhët e Policisë.
Në lidhje me perceptimin e publikut ndaj punës së policisë, Balla nënvizoi se njerëzit gjykojnë veprat e jo fjalët, ndërsa i bëri thirrje qytetarëve, të tregohen mbështetës të Policisë.
“Njerëzit nuk na gjykojnë nga ato që themi, por nga veprimet që bëjmë, shembulli që japim, modeli që krijojmë. Ndërtimi i besimit te Policia e Shtetit është detyrë emergjente, por edhe një proces jo i lehtë. Dua t’i bëj një thirrje çdo qytetari sot nga Berati: – kini besim!”, tha Balla.
Sa i përket procesit të luftës ndaj fenomeneve të korrupsionit apo të paaftësisë profesionale, ai tha se që ditën e parë në këtë detyrë ka ardhur me vetëdijen se suksesi në punën e tij është i pamundur pa drejtuesit dhe punonjësit e ndershëm të Policisë së Shtetit.
“Krijimi i një fryme skuadre në luftën për përmbushjen e objektivave të këtij sektori është baza e suksesit që synoj. Dita duket që në mëngjes. Ka filluar të duket qartë se vetëpastrimi i Policisë së Shtetit është një proces, i cili po hyn në një fazë të re”, tha Balla.
Discussion about this post