Mohamed Ihattaren, 21 vjeçari nga Utrehti që konsiderohej një nga perlat e futbollit holandez, ka bërë që të flitet përsëri për të… nagativisht “of course”. Pasi u dallua si adoleshent te PSV Eindhoven, futbollisti me origjinë marokene u transferua te Juventusi në verën e vitit 2021.
Mohamed Ihattaren bëri debutimin e tij për PSV-në herët, në moshën 17-vjeçare dhe tërhoqi menjëherë vëmendjen e klubeve më të mëdha evropiane, përfshirë edhe Barcelonën. “Ai ka talentin natyral që kishin vetëm Rijkaard dhe Van Basten”,- thanë ata nga Eindhoven. Veç që djali nga Utrecht humbi rrugës dhe sabotoi veten: ai nuk konfirmoi në terren dhe përfundoi duke vuajtur për shkak të lidhjeve të tij me botën e krimit.
Mohamed Ihattaren, talenti i arrestuar për lidhje me mafian
Nuk bindi Mohamed Ihattaren te Juventusi, i cili u përpoq ta ringjallte karrierën e tij me disa huazime. Fatkeqësisht, holandezi nuk mori minuta as te Sampdoria dhe as te Ajax. Madje në Genova erdhi me 5 kilogramë më tepër. Më pas, pa lajmëruar, nuk paraqitet më në stërvitje. Ai shkoi në shtëpi në Holandë dhe madje mendoi të hiqte dorë nga futbolli.
Ihattaren ka qenë gjithashtu në kryetitujt, jo për futbollin, por për problemet me disiplinën dhe ligjin. Rënia e të riut në fakt filloi që në tetor 2019, kur ai ishte vetëm 17 vjeç. Pas vdekjes së babait të tij, Muhamedi u prek jashtëzakonisht shumë. Ai as sot e kësaj dite nuk ka arritur të kapërcejë momentin e ekuilibrit.
Në nëntor 2022, mesfushori u arrestua për lidhje me drejtuesit e “Mocro Maffia”, një organizatë kriminale në Holandë, e përbërë nga të rinj me rrënjë marokene. Arriti deri aty sa disa anëtarë të organizatës i vunë flakën makinës së tij, një Porsche, m’u në mes të Utrehtit.
Ihattaren kishte probleme edhe me ish-bashkëshorten e tij, Yasmine. Pas një martese që zgjati vetëm disa muaj, mes të dyve filluan skandalet dhe Mohamed u arrestua edhe një herë, në shkurt 2023, pasi dyshohet se e kishte rrahur.
I lëshuar pas 48 orësh dhe me një hetim ende në vazhdim, ish-fëmija i mrekullueshëm holandez nuk ka mundur të fokusohet fare te futbolli. Pak ditë më pare, Juventusi i ndërpreu kontratën.
Mohamed Ihattaren u përpoq të mashtronte turqit, të cilët nuk e hëngrën
Menjëherë pasi “Zonja e Vjetër” e largoi atë, Mohamed Ihattaren iu ofrua nga skuadra turke, Samsunspor. Të dy palët ranë dakord për një angazhim katërvjeçar dhe Ihattaren u prit me bujë të madhe në Turqi për vizitën e tij mjekësore. Pas vetëm dy ditësh, gjithçka u prish.
“Ne ramë dakord me Ihattaren, që ai të paguhet për çdo ndeshje që luan në gjysmën e parë të sezonit, sepse ai nuk është gati me stërvitjen e tij fizike. Ai pranoi dhe fansat tanë e mirëpritën. Më pas, menaxheri i tij u përfshi dhe ndryshoi kushtet e kontratës.
Ata na thanë se ai ende nuk ka nënshkruar dhe se lojtari kërkon një pagë mujore. Ata kërkuan edhe një premium instalimi, sepse ishte falas. Plus një përqindje e një transferimi të ardhshëm. “Unë nuk e pranova një gjë të tillë. I thashë gjithashtu: ‘Ti je lojtar problematik, pse të paguajmë nëse nuk luani?’. Gjithçka ishte për paratë”,- tha Yuksel Yildirim, president i Samsunspor, cituar nga “Voetbal International”.
Mohamed Ihattaren, i vlerësuar dy vjet më parë në 12 milionë euro, sot vlen vetëm 300.000 euro, sipas “Transfermarkt”. Në këtë kontekst, me kaq shumë pika të zeza në CV-në e tij, është e vështirë të besohet se ai do të gjejë një klub që do t’i japë një tjetër shans.
Discussion about this post