Pas shumë eksodeve dhe pikëpyetjeve për ecurinë e klubit, Erzeni i Shijakut duket se më në fund po jep shenja të mira dhe po mendon për të forcuar skuadrën për sezonin e ri të Kategorisë Superiore dhe Kupës së Shqipërisë. Bëhet me dije se shijakasit kanë arritur marrëveshjen me një fantazist argjentinas.
Agustin Rojas ka zbarkuar në Shqipëri dhe është në negociata të avancuara me drejtuesit për t’u bashkuar me skuadrën. Aktualisht Rojas është pjesë e skuadrës “B” të Racing Club de Avellaneda në Argjentinë.
Mesfushori ka luajtur edhe në Kategorinë e Tretë argjentinase me Deportivo Santamarina, teksa shihet të mos ketë shënuar asnjë gol në ndeshje zyrtare, referuar “Soccerway” dhe “Transfemarkt”.
Mbetet të shihet se sa efekt do të ketë 24-vjeçari, por duhet thënë se në të shkuarën kanë ardhur argjentinas që kanë bërë mjaft mirë në futbollin tonë, më i freskëti Agustin Torasa. Rojas bëhet afrimi i dhjetë i Erzenit në këtë verë, teksa janë larguar edhe plot 15 lojtarë, që kishin rol kyç në sezonin e shkuar./PanoramaSport
Discussion about this post