Shkatërrimi i lulishtes në qendër të Tiranës për t’i hapur rrugë punimeve të kullës 205 metra të lartë të quajtur “Mali i Tiranës”, u shoqërua me një sfidë direkte për kreun e opozitës, Sali Berishën. Fakti nëse ky do të fliste apo do të heshtte për kullën dhe pronarët e saj u pa si një test për llojin e opozitës që mund të bëjë Berisha. Madje vëmëndja për Berishën ishte më e madhe se sa përgjegjësia e Edi Ramës dhe Erjon Veliajt që hodhën firmat për lejen e ndërtuesve të kompanisë Nova Construction.
Në protestën që organizoi në hyrje të rrethimit të lulishtes në Rrugën e Barrikadave, kreu i Lëvizjes Bashkë, Arlind Qori ishte i pari që e ceku mundësinë e përfshirjes së partive të opozitës në biznes me qeverinë. Ai foli për “parti të vjetra që përfitojnë nën rrogoz nga të njëjtët përbindësha prej betoni dhe nga të njëjtët oligarkë dhe nga të njëjtët gangster”.
Një deklaratë e tillë në protestë do kalonte në heshtje sikur një pjesë e mirë e mediave që kontrollohen nga qeveria të mos i bënin jehonë të njëjtit mesazh. Këta i hodhën dorashkën e sfidës Berishës nëse mund të fliste apo jo për shkatërrimin e lulishtes dhe ndërtuesit e kullës. Megjithëse nuk doli në protestë, edhe Lulzim Basha bëri një reagim në Facebook ku foli për “bashkëfajësi mafioze” dhe për një “kastë 33 vjeçare që bëhen bashkë si dy duar që lajnë fytyrat e nxira nga korrupsioni”.
Sfidës për të folur për kullën “Mali i Tiranës”, iu përgjigjën Sali Berisha dhe i biri, Shkëlzen Berisha. “Për t’i dhene nje pergjigje kujtdo qe ka ngelur ne grepin e shpifjes se radhes po i bej nje sfide publike Edi Rames qe te revokoje lejen e ndertimit, ose te pranoje ne heshtje se pas saj njelloj si per qindra leje te tjera jane pazaret qe ai firmos paf paf paf e fap fap fap bash si per vjedhjen e inceneratoreve” shkroi Shkëlzen Berisha në rrjetet sociale.
Pak më pas, në një konferencë për mediat për inceneratorin e Tiranës, Sali Berisha reagoi edhe për kullën e re që do të ndërtohet në qendër “Në qoftë se Edi Rama paska dhënë leje për Shkëlzen Berishën, duhet të kesh humbur çdo mendje, duhet të bëhesh shpifës i kalibrit të Ymer Bazes, apo Carlo Bollinos që të nxjerrësh shpifje të tilla. Megjithatë, e ftoj Edi Ramën të anulojë menjëherë lejen” tha Sali Berisha.
Pavarësisht të gjithave, projekti “Mali i Tiranës” është përzgjedhur nga një juri e drejtuar nga kryeministri Edi Rama që në datën 1 Tetor të vitit të kaluar. Dhe as Rama, as Veliaj nuk janë fshehut. Përkundrazi, aktiviteti për të përcaktuar projektin më të mirë arkitekturor u zhvillua i hapur dhe u transmetua live në disa media.
Ditën e sotme në zonën e rrethuar në lulishten ku do të ndërtohet kulla 205 metra e lartë ka skrepa dhe buldozerë që do të hapin gropën e ndërtimit. Sipërfaqja e ndërtimit do të jetë rreth 70 mijë metër katrorë. Kulla do të jetë 58 kate, me një lartësi prej 205 metrash dhe do të ndërtohet nga Nova Construction.
Shkatërrimi i një lulishteje nuk është hera e parë që ndodh në Tiranën që drejtohet nga Erjon Veliaj.
Në vitin 2015, një shumëkatësh rrëmbeu disa hektarë gjelbërim në krahun verilindor të Parkut të Madh të Liqenit Artificial të Tiranës. Në vitin 2017, një hapësirë e gjelbër, e njohur në kryeqytet si ish Parku i Autobuzëve u shkatërrua në vitin 2017, pas një leje ndërtimi që mundësoi ngritjen e një kompleksi pallatesh shumëkatëshe. Njësoj në fillim të rrugës së Elbasanit u prish në vitin 2018 një pjesë qëndrore e parkut ikonik të kryeqytetit, i ashtuquajturi “Lodrat e Elbasanit”, ndërsa më pas projektet e betonit kanë avancuar në disa zona të gjelbra, si tek Garda e Republikës që është zhvendosur tashmë për t’i hapur rrugë ndërtimeve shumëkatëshe.
Është e qartë se Bashkia e Tiranës nuk ka më asnjë fuqi që t’i bëhet barrierë projekteve të betonizimit të qytetit në funksion të biznesit, ndryshe nga çfarë premtoi Veliaj para se të zgjidhej kryetar bashkie në vitin 2015. /Lapsi.al/
Discussion about this post