Një atentat i mirëfilltë ka qenë ai ndaj ish-deputetit dhe ish-kryetarit të Komunës së Velipojës, Pashko Ujka, mbrëmjen e djeshme.
Ngjarja e rëndë u shënua në lagjen “Vasil Shanto” të Shkodrës, rreth orës 19:00. Viktima ishte duke bërë një shëtitje me bashkëshorten e tij në lulishten e Universitetit, ndërsa nuk ka pasur asnjë dyshim nga bashkëshortja e tij për atë që mund të ndodhte. Bashkëshortja e kuptoi se diçka nuk shkonte vetëm në momentin kur ka parë ish-deputetin të shtrirë dhe të mbuluar në gjak.
Nga burimet konfidenciale bëhet me dije se policia ka identifikuar autorin, i cili e qëlloi me armë silenciator, për të mos rënë në sy dhe për të mos përhapur panik, ndërsa është duke vijuar punën për kapjen e tij. Ndërsa, sa i takon pistave të hetimit nga ana e policisë është ajo që lidhet me punën e tij si ish-kryetar i Komunës së Velipojës, ndërsa pista e dytë e hetimit ka të bëjë me disa borxhe që ai ka akumuluar ndër vite, ku në fakt rezulton të jetë ajo që është fokusuar edhe grupi hetimor.
Ndaj 64-vjeçarit është bërë disa herë atentat, madje ka rënë pre e dhunës nga persona të tjerë. Në një rast mësohet se kanë qëlluar me armë zjarri në ajër në afërsi të banesës së tij. Dy herë Pashko Ujka është goditur fizikisht, ndërsa sot familjarët përgenjeshtrojnë lajmet të cilat kanë qarkulluar në media.
Familjarët kanë deklaruar se “ Nisur nga lajmet në media për vrasjen e Pashko Ujkës, nuk është e vërtetë që ai të jetë plagosur, kërcënuar apo qëlluar shtëpia gjatë kohës kur ka qenë deputet apo kryetar i komunës Velipojë. Gjithashtu ,nuk ka pasur borxhe financiare dhe as mosmarrëveshje për çështje ndërtimesh”.
Ndonëse në policinë lokale të Shkodrës hera-herës, viktima ka denoncuar persona të cilët kërcënojnë apo kanë qëlluar në drejtim të tij, familjarët përsëri kundërshtojnë këtë fakt, duke ndryshuar edhe rrjedhën e hetimeve.
Ndërkohë, një hermetizim vihet re edhe në blutë e Shkodrës, të cilët pohojnë se nuk kanë një pistë ku po fokusohen, edhe pse ekzistojnë dy të tilla dhe nuk dihen shkaqet që kanë çuar në këtë atentat, ndonëse në “dosjen” e viktimës ka pafund kërcënime dhe tentativa për atentat ndonëse kanë dështuar deri mbrëmjen e djeshme.
Edhe pse Pashko Ujka kishte 6 vite që nuk mbante asnjë funksion politik apo zyrtar, duket se autorët kanë pritur momentin e duhur të hakmerren karshi viktimës.
Po pse u zgjodh pikërisht shtëpia e tij për ta ekzekutuar?
Kjo ishte hera e dytë që i është bërë atentat, ku më herët kanë qëlluar në drejtim të banesës së tij në Velipojë, ngjarje e cila mbeti e pazbardhur akoma sot. Mbrëmjen e djeshme, atentati ndodhi vetëm 10 metra larg banesës së ish-kryetarit Ujka, në një vend ku lëvizjet nuk mungojnë gjatë gjithë orëve të ditës apo edhe natës. Por duket se autori nuk e ka menduar gjatë, se bizneset e shumta janë të rrethuara nga kamerat e sigurisë dhe shumë shpejt do ta nxjerrin zbuluar, duke bërë të mundur që nga ana e policisë të bëhet identifikimi i tij brenda pak orëve që ka ndodhur atentati.
Discussion about this post