Një tjetër futbollist zgjedh t’i bashkohet kombëtares shqiptare të futbollit, duke u larguar nga Kosova, ose të paktën kështu pretendohet nga mediat atje.
Arbnor Muja, mesfushori i talentuar ofensiv, ka vendosur që të veshë fanellën kuqezi, edhe pse në mars ishte pjesë e grumbullimit të Kosovës.
Mosaktivizimi i 24-vjeçarit në sfidat ndaj Izraelit dhe Andorrës, bën të mundur që ai të ndryshojë nëse dëshiron kombëtaren dhe sipas “Telegrafi’, lojtari i cili po tregon vlerat e tij te Antverp në kampionatin belg, ka vendosur që të veshë fanellën kuqezi.
Të njëjtat burime sqarojnë se Muja ka qenë në Shqipëri për t’u pajisur me pasaportën shqiptare dhe pritet që të mbyllë shumë shpejt procedurat burokratike në mënyrë që të merret leja në FIFA dhe ai të jetë në grumbullim me kuqezinjtë që në ndeshjet e shtatorit.
Megjithatë, duhet kujtuar se pak muaj më parë, në mediat kosovare qarkulloi e njëjta histori për Mirlind Dakun, pasi ky i fundit u pajis me pasaportën shqiptare.
Por më pas u mësua se kjo kishte ndodhur për lehtësi burokratike pasi lojtari u transferua në Rusi ku e kishte të pamundur të qëndronte me dokumentet e ish-krahinës autonome.
Discussion about this post