Kush është miku i Veliajt që proteston kundër Ramës?

Tre Kryebashkiakë grekë morën pjesë në protestën e organizuar në pedonalen e Himarës pasditen e së hënës, nga ku u kërkua lirimi i Fredi Belerit nga paraburgimi dhe lejimi i tij për marrjen e detyrës së kryetarit të Bashkisë së Himarës.

Mes kryebashkiakëve grekë ishte edhe Kostas Bakoyannis, kreu i Bashkisë së Athinës, i cili përcolli mesazhe të prera dhe të qarta për Kryeministrin Edi Rama.

“Demokracia nuk burgoset. Zëri i qytetarëve nuk hesht. Urdhri i popullit nuk shkelet. Himara e ka zgjedhur kryebashkiakun dhe ai është Fredi Beleri. Fredi Beleri ka të drejtë të betohet si kryebashkiak dhe të marrë detyrën e tij. Është e drejta e tij, por është e drejta edhe  e popullit të Himarës. Dëshiroj të mirëpresin Shqipërinë në familjen europiane, duam të jetojmë bashkë në shtëpinë tonë të madhe, por kjo shtëpi do themele, shteti i së drejtës, demokracia, janë principet tona dhe janë të panegociueshme”, tha ai.

Por kush është Bakoyannis, kryebashkiaku i Athinës që protestoi në Himarë kundër Edi Ramës?

Në Shqipëri ai njihet si miku i Erion Veliajt, kryebashkiakut të Tiranës. Edhe gjatë fushatës së fundit për zgjedhjet bashkiake, Veliaj nuk nguroi disa herë të përmendë emrin e Bakoyannis, teksa fliste për investimet që kishte bërë Bashkia e Tiranës në zonën e Farkës.

Madje, Bakoyannis nuk ka nguruar që pak javë përpara zgjedhjeve të 14 majit të përcjellë një mesazh mbështetës për Veliajn, i cili garonte për një mandat të 3-të për qeverisjen e Tiranës.

“Përshëndetje nga Athina! Kam kënaqësinë të përcjell këtë mesazh dhe të mbështes mikun tim të mirë dhe të shtrenjtë Erion Veliaj. Të gjithë ju e njihni Erionin!”, shprehej Bakoyannis në mesazhin e tij.

Në anën tjetër, Veliaj në takimet e tij elektorale, vazhdimisht përmendte emrin e kryebashkiakut të Athinës, të cilin më parë e kishte nderuar edhe me “Çelësin e Qytetit”.

Por duket se ajo çka ndodhi me Himarën, arrestimi i Fredi Belerit dhe mbajtja e tij në paraburgim, ka bërë që Bakoyannis këtë rradhë të vijë në Shqipëri jo më si “mik i ftuar” nga Veliaj, por si një protestues, kundër Edi Ramës. Natyrisht që Veliaj, pavarësisht miqësisë që mund të ketë me Bakoyannis, nuk mund të ndalojë këtë të fundit të protestojë kundër Kryeministrit Rama, aq më tepër kur ky i fundit e ktheu në personale luftën me Fredi Belerin, deri sa e arrestuan dy ditë para zgjedhjeve të 14 majit.