Prag tragjedie në Himarë, shpërthen bidoni i benzinës në skaf

Një ngjarje e rëndë është shënuar sërish në plazhet tona, e sërish në Himarë.

Një skaf ka pësuar avari të rëndë në plazh, pasi ka shpërthyer bidoni me 28 litra benzinë, ndërsa në det kishte shumë persona duke bërë not.

Për pasojë, pesë të rinj janë plagosur. Ata janë dërguar në spital, ndërsa janë jashtë rrezikut për jetën. Ata pësuan djegie nga spërkatat e benzinës.

“Dhërmi, Himarë/Informacion paraprak

Rreth orës 17:30, në zonën e Drimadhës, Himarë, në një mjet lundrues skaf në pronësi të një kompanie turistike, që sapo kishte dalë në det nga korridori ujor i miratuar, dyshohet se si pasojë e vakumit dhe nxehtësisë, ka shpërthyer një bidon me 28 litra benzinë.

Nga sprucimi i benzinës kanë pësuar djegie të lehta shtetasit A. K., 24 vjeç, A. H., 24 vjeç, L. S. 24 vjeç dhe M. K., 21 vjeçe, të katërt nga Kosova, si dhe drejtuesi i skafit, shtetasi N. L., 32 vjeç, banues në Vlorë.

Të pestë këta shtetas kanë marrë ndihmën e parë mjekësore dhe më pas janë larguar pasi dëmtimet ishin të lehta.

Në vendngjarje ka shkuar grupi hetimor dhe në drejtimin e Prokurorisë vijon punën për dokumentimin e plotë ligjor të shkakut të përfshirjes nga zjarri, të mjetit turistik”, njofton policia.