Viktor da Silva vijon të mungojë në stërvitjen e Partizanit pas ndëshkimit që mori nga trajneri Zoran Zekiç. Ky i fundit urdhëroi pas ndeshjes në Letoni, që braziliani t’i bashkohej skuadrës U21 të klubit, që drejtohet nga Gerd Haxhiu.
Mirëpo, Da Silva nuk është paraqitur as në ekipin e dytë të “demave” dhe gjasat janë që tashmë klubi ta penalizojë financiarisht lojtarin. Krisja nisi pas përfundimit të ndeshjes së parë ndaj Valmierës në Riga, ku Da Silva nuk pranoi të kryejë vrapime rreth fushës, por u fut direkt në dhomat e zhveshjes.
Kjo irritoi kroatin, që mori masë ndaj fantazistit. Duke parë këtë situatë të tensionuar mes palëve dhe për më tepër që jemi në kulmin e merkatos, klube të tjera shqiptare, por jo vetëm, duan të përfitojnë. Së fundmi sinjale të qarta për 28-vjeçarin mësohet se ka pasur nga Ballkani i Ilir Dajës.
Kampionët e Kosovës pëlqejnë brazilianin, por ai është nën kontratë me Partizanin deri në verën e vitit të ardhshëm. Situatën e Da Silvës po e shqyrton edhe Vllaznia, por gjithsesi mbetet për t’u parë se çfarë do të vendosë klubi i kuq./PanoramaSport
Discussion about this post