Rreth 25 mijë të punësuar në shkallë vendi, të cilët aktualisht kanë një pagë më të lartë se 170 mijë lekë në muaj do të përballen me një rritje të ndjeshme të kontributeve që ata paguajnë për sigurimet shoqërore.
Instituti i Sigurimeve Shoqërore sqaron se pas rritjes së pagës minimale në 40 mijë lekë në muaj është rritur automatikisht dhe paga maksimale, mbi të çilën mbahen sigurimet shoqërore.
Sipas ISSH, paga maksimale për efeket të kontributeve tashmë do të jetë mbi 176 mijë lekë në muaj nga rreth 150 mijë lekë që ka qenë deri më tani. Rrjedhimisht punonjësve u rriten automatikisht edhe sigurimet shoqërore që ata do të paguajnë në shtet.
Më konkretisht, shuma totale e sigurimeve për pagën maksimale bëhet 43,222 lekë në muaj, nga 36,739 lekë në muaj, që ishte deri më tani. Shtesa 6,483 lekë ose 60 euro më shumë në muaj sigurime.
Kjo shtesë ndahet midis punëdhënësit dhe punëmarrësit. Kështu biznesi do ta paguajnë 3,969 lekë më shumë në muaj për një të punësuar me pagë maksimale, ndërsa vet i punësuari do paguajë 2,514 lekë shtesë në muaj.
Discussion about this post