Arqipeshkvi i ri Arjan Dodaj rrëfehet: Nga largimi me skaf, tek rruga drejt Zotit

Imzot Arjan Dodaj, do të jetë Arqipeshkvi i ri i Arqidioqezës Tiranë-Durrës, duke zëvendësuar në këtë detyrë imzot George Frendon, pas dorëheqjes së këtij të fundit.

Ai ka rrëfyer rrugëtimin e tij, teksa thekson se si shumë të rinj shqiptar është larguar nga vendi me skaf, ndërsa jep detaje si nisi praktikimin e besimit të tij fetar.

“Si shumë shokë të mi, jam larguar nga vendi me skaf, për të realizuar ëndrrat. Zoti më ruajti nga disa përvoja të caktuara apo miqësi. Duke ndenjur me një grup djemsh që shkonin në një famulli, ngadalë lindi te mua pikëpyetja mbi diçka që shkonte përtej materiales”, shprehet Dodaj.

Ai komentoi gjendjen e shoqërisë shqiptar, teksa bëri thirrje që shqiptarëve të iu rikthehet besimi sërish tek shqiptari. Ai shprehet se duhet të përqendrohemi tek edukimi dhe kultura si zgjidhje ndaj shumë problematikave:

“Kemi nevojë që ta pasurojmë kulturën, pasi kultura pa njeriun nuk ndërtohet dot. Ne flasim shpesh për kulturën, por anulojmë njeriun”. Politikën e sheh si pasqyrë të popullit, e për këtë kërkon nga shqiptarët rikthimin e vlerave të të parëve: “Shqiptari duhet të zbulojë sërish besimin te shqiptari.

Ne e kemi aftësinë e fjalës së dhënë, të besës. Sot, nuk të pret në besë politikani, por vëllai ose miku. Nëse nuk kthehemi te vlerat morale, nuk mund të kemi arsye që të pretendojmë që dikush tjetër të na dalë zot”.

Meshtari i mirënjohur, don Arjan Dodaj, lindi në Laç të Kurbinit, në Kryediqezën e Tiranë-Durrësit, më 21 janar 1977. Në vitin 1993, pasi kishte kryer shkollën e mesme në qytetin e lindjes, emigroi në Itali. U vendos në Cuneo, ku nisi të punojë.

Më 1977 kërkoi të pranohej në Vëllazërinë Meshtarake të Bijve të Kryqit, pranë Bashkësisë “Shtëpia e Marisë”, në Romë. Në rrugën e përgatitjes për meshtari, nisi studimet e filozofisë e të teologjisë pranë Universitetit Papnor “Mbretëresha e Apostujve” ku mori titullin e Bakalaureatit.

U shugurua meshtar më 11 maj 2003 nga Papa Gjon Pali II, në Bazilikën e Shën Pjetrit dhe u inkardinua në Dioqezën e Romës, si anëtar i Vëllazërisë meshtarake të Bijve të Kryqit, në bashkësinë ” Shtëpia e Marisë”.

Pas shugurimit meshtarak kreu detyra të ndryshme baritore. Nga 2003 deri më 2004 ishte zëvëndës-famullitar në Famullinë “Shën Domenico Guzman”, në Romë; nga 2004 deri më 2005, Zëvendës-Rektor i Rektorisë  së “San Giovanni della Malva” dhe Kapelan i bashkësisë shqiptare në Romë; nga 2005 deri më 2017, zëvendës famullitar i Famullisë “Shën Rafaeli Kryeengjëll”, në Romë.