Reshjet e shiut dhe borës që përfshinë vendin ditët e fundit shkaktuan probleme me qarkullimin në qarqe të ndryshme, ku jo pak herë është dashur ndërhyrja e emergjencave civile. Por vetëm një ditë pas pushimit të reshjeve, situata po shkon normalizimit.
Kështu, Komisioni i Mbrojtjes Civile në prefekturën e Kukësit njofton se situata pas reshjeve të shiut dhe borës, është e qetë dhe rrugët nacionale janë të kalueshme.
Sipas njoftimit, kontraktorët kanë punuar gjatë natës për pastrimin nga inertet e rëna në disa segmente rruge, kriposjen dhe mbajtjen funksionale të tyre.
Rrugët rurale në administrim të bashkive janë të qarkullueshme, përveç rrugës së që lidh njësinë administrative Arrën me rrugën nacionale. Gjithashtu, mësohet se nuk ka probleme me furnizimin me ujë të pijshëm dhe energjinë elektrike.
Situata është normalizuar në bashkitë Elbasan e Gramsh, ndërsa po punohet nga OSHEE për riparimin e defekteve në Librazhd, Labinot dhe Elbasan.
Discussion about this post