Ish-trajneri i njohur shqiptar, Neptun Bajko e konsideron një ndeshje jetike për Partizanin atë të sotmen, përballë klubit kazak, Astana, për fazën playoff të conference League, por bën apel që të veprohet me kujdes dhe me shumë kthjelltësi.
“Së pari më vjen mirë që kanë arritur deri këtu – thotë ish-trajneri i shquar i të kuqve për “Panorama Sport” – Dikur kemi luajtur edhe me Torinon, por sot kanë shansin të shkruajnë historinë. Janë një brez i mirë lojtarësh dhe në një moment të mirë.
Kanë kushte më të mira dhe një frymë pozitive si klub. Rezultatet e tregojnë këtë. Uroj me shpirt t’ia dalin. Do të ishte një faqe e re e ndritur e historisë së këtij klubi. Astana është ekip i vështirë, unë e pashë ndeshjen e parë dhe duhet shumë kujdes. Por duhet kujdes. Unë kam tri këshilla për këtë ndeshje:
1) Tifozët ta mbështesin me të gjitha mundësitë skuadrën. Duhet të organizohen si kurrë më parë, por të bëjnë kujdes. Thirrja ime për ta është që të bëjnë kujdes dhe të mos shkaktojnë asnjë incident që i bën dëm klubit. Në ndeshje si këto monitorimi i UEFA-s është i madh.
2) Skuadra duhet të jetë gati psikologjikisht. Kjo është punë e trajnerit dhe besoj ka folur me ekipin. Nuk duhet të ngarkohen emocionalisht shumë. Por duhet punë ama që të kenë balancën e duhur mes dëshirës për të bërë mirë dhe euforisë se mund të shkojnë në grupe. Duhet kujdes.
3) Mbrojtja më e mirë është sulmi… Nuk duhet të rrëmbehen nga atmosfera që krijohet. Janë 90 minuta, duhet më së pari siguri në mbrojtje, pastaj në sulm duhet shkuar me mendim. Kujdes ato 16 metrat e fundit, sa më pak gabime aq më mirë, sepse Astana është e rrezikshme. Por edhe Partizani di të godasë. Ndaj të kenë besim te vetja”, deklaroi Bajko./PanoramaSport
Discussion about this post