Asamblea e PS-së mblidhet pasditen e sotme, ndërsa pritet që Kryeministri Edi Rama të propozojë emrat e rinj të Sekretariatit të kësaj partie, rreth 40 ditë pasi njoftoi shkrirjen e kupolës drejtues të socialistëve, ku goditjen më të madhe e pati Damian Gjiknuri, që mbante funksionin e Sekretarit të Përgjithshëm.
Gjithashtu Kryeministri mund të njoftojë ndryshime në kabinetin qeveritar, një pjesë e të cilave janë artikuluar nga media prej të paktën dy muajsh, por nuk dihet nëse Rama do të shfrytëzojë këtë mbledhje për një riformatim të Qeverisë apo do të vijojë deri në vjeshtë me kabinetin aktual.
Sipas raportimeve, pritet që Kreu i Qeverisë, ti drejtohet anëtarëve të Asamblesë me një fjalim të gjatë, ku pritet të evidentohen arritjet, por edhe kritika të forta. Nuk përjashtohet mundësia që një mesazh Kryeministri ta ketë për SPAK, strukturën që heton korrupsionin e “jakave të bardha”, për të cilën edhe më parë ka shprehur pakënaqësinë, që po godet vetëm në krahun e Qeverisë.
Ashtu si edhe në mbledhjen e fundkorrikut, Rama pritet të marrë meritat lidhur me reformën në drejtësi, por edhe të ripërsërisë mesazhin se askush nuk do të ketë mbrojtjen e socialistëve nëse do të ketë probleme me ligjin, edhe pse vetë Kryeministri prej ditësh ka nisur një process për të mbrojtur “sterilizimin”, një prej aferave që po hetohet nga SPAK dhe që ka çuar në burg një ish-zv.ministër, po hetohen disa personazhe, por që ende nuk ka një vendimmarrje mbi fatin e Ilir Beqajt.
Gjithsesi Kryeministrit i duhet të japë mesazhet “populiste” se askush nuk ka suportin e Qeverisë, Grupit Parlamentar, apo Partisë Socialiste, pavarësisht akuzave apo dyshimeve që ngrihen, mbi mënyrën se si operohet në praktikë.
E gjithashtu pritet që nga Edi Rama të dëgjojmë sërisht “këshillën” drejtuar deputetëve e kryebashkiakëve se në mandatin të tretë qeverisës dhe pas rezultatit të zgjedhjeve vendore të 14 majit, ata duhet të mbajnë veshët e sytë nga qytetarët, të mos bëjnë dallime mbi bindjet e tyre politike, dhe të zgjidhin problemet.
Natyrisht që Kryeministri do të evidentojë arritjet, ku si më të freskëtën, do të përmendë miliona turistë që kanë ardhur në Shqipëri, si asnjëherë më parë, dhe nuk diskutohet që kjo është rezultat i punës së Qeverisë së tij.
Në fund, Edi Rama, i veshur me kostumin e kryeministrit, por edhe të kryesocialistit rilindas, sigurisht që do të befasojë, ose do të lërë gojëhapur, nga bashkëpunëtorët e tij deri te anëtari më i fundëm i Asamblesë, kur të lakojë emrat e atyre që do të bëhen pjesë e kupolës së partisë apo do të kenë luksin të jenë pjesë e Qeverisë.
Mos u çudisni kur mes emrave të ketë nga ata që i njeh vetëm Kryeministri, apo rrethi i ngushtë i tij, pasi në fund të fundit, me mënyrën se si qeveris Edi Rama, çdokush është një i bindur, që nuk prodhon as politikë, as debate, as ide, thjesht zbaton me përpikmëri porositë, këshillat dhe projektet e Kryetarit, që mban shumë funksione.
Discussion about this post