Autori i vrasjes së Sokol Çapaj, i dënuar me 25 vite burgim është rishfaqur në gjykatë për të dëshmuar në Gjykatën e Posaçme në Tiranë në seancën që po mbahet ndaj Ervis Bardhit, Ardjan Çapjas, Klajdi Dokolit dhe Etien Canit, të cilët akuzohen se kanë kryer në bashkëpunim vrasjen e babë e bir, Gentian dhe Nezir Beqirit në 15 gusht 2012 në Elbasan. Armand alias Butrint Hasani u pyet lidhur me këtë ngjarje, ku tregoi se me viktimën Gentian Beqiri njihej pasi kishin qëndruar në të njëjtin burg, teksa i pyetur pyetur për detaje të vrasjes së mikut të tij, Hasani u përgjigj shkurt se nuk kishte dijeni se çfarë ka ndodhur, pasi ai në atë periudhë ka qenë në burg dhe nuk kishte si të informohej.
I pyetur nëse ai vetë apo familjarët e tij kishin marrë kërcënime nga anëtarë të familjes Çapja, Hasani zgjodhi të mos përgjigjej. Ndërkohë, ishte parashikuar që në seancën e sotme të pyetej edhe Behije Arapi, nëna e Gentianit dhe gruaja e Nezirit, vajza e saj Valbona Beqiri, Aurela Bardhi, gruaja e Ervis Bardhit, polici Neshat Budani, Kujtim Ajazi, Albert Uzuni, Geralda Teta dhe Astrit Cani. Por asnjë nuk u paraqit në sallë. Ndaj dhe seanca e marrjes në pyetje është shtyrë për një herë tjetër, duke ripërsëritur tek ta edhe fletë-thirjen.
Armand alias Butrint Hasani, i dënuar për ngjarjen e ndodhur në dhjetor të 2005-ës në Elbasan, po vuan dënimin në burgun e Peqinit.
Gentian dhe Nezir Beqiri u ekzekutuan në shtëpinë e tyre në 15 gusht 2012, nga Jorgo Leku në bashkëpunim me Etien Canin. Ata ishin paraqitur në shtëpinë e Nezir Beqirit si miqtë e djalit, Gentianit i cili ndodhej i paralizuar dhe në arrest shtëpie, pas një përplasje me policinë pasi ishte në kërkim për një tjetër ngjarje të rëndë të ndodhur në Elbasan.
Etien Cani bashkë me Lekun, shkuan në shtëpinë e shokut të tyre Gentian Beqiri, duke përshëndetur policët e vendosur në hyrje të pallatit për të mbikëqyrur Nezirin. Ishte babai i shokut të tyre ai që i hapi derën pasi njohu shokët e djalit. Në atë moment Cani qëlloi me armë ndaj Beqirit duke e lënë të vdekur në vend.
Discussion about this post