Skenari i vizitës së liderit të Koresë së Veriut Kim Jong-un në Rusi për tu takuar me presidentin rus Vladimir Putin ka mbushur mediat ndërkombëtare, pas një raporti të një zyrtari amerikan.
Takimi do të nënvizonte thellimin e bashkëpunimit mes dy vendeve, në një kohë kur dy liderët e izoluar janë në mosmarrëveshje me SHBA- në.
Çfarë do të thotë një udhëtim i mundshëm i Kim në Rusi?
Nevojë urgjente për armë
Që nga viti i kaluar, zyrtarët amerikanë kanë raportuar se Koreja e Veriut ka furnizuar Rusinë me predha artilerie, raketa dhe municione të tjera, shumë prej të cilave me gjasë janë kopje të municioneve të epokës sovjetike.
“Rusia ka nevojë urgjente për armë lufte. Nëse jo, si mund të vijë ministri i mbrojtjes i një vendi të fuqishëm në luftë në një vend të vogël si Koreja e Veriut?” tha Kim Taegu, ish-kreu i Institutit Korean për Bashkimin Kombëtar në Seul.
Siç shpjegoi ai, Shoigu ishte ministri i parë rus i mbrojtjes që vizitoi vendin pas shpërbërjes së Bashkimit Sovjetik në 1991.
Blerja e municioneve nga Koreja e Veriut do të ishte shkelje e rezolutave të OKB-së, të cilat mbështeten nga Rusia dhe ndalojnë tregtinë e armëve me vendin e izoluar.
Megjithatë, Moska tani përballet me pasojat nga sanksionet ndërkombëtare dhe kontrollet e eksporteve për luftën në Ukrainë dhe ka të ngjarë të kërkojë armë nga vende të tjera të sanksionuara si Koreja e Veriut dhe Irani.
Koreja e Veriut ka rezerva të mëdha municionesh. Megjithatë, analisti në Institutin Asan për Studime Politike në Seul, Doo Hyogne Cha, beson se vendi nuk mund të dërgonte menjëherë sasi të konsiderueshme municionesh në Rusi, për shkak të lidhjes së ngushtë së dy vendeve që kufizon transportin hekurudhor.
Prioritetet e Kim do të ishin sigurimi i ndihmës për vendin e tij, rritja e prestigjit të tij dhe përmirësimi i ekspertizës ushtarake, thonë ekspertët.
Koreja e Veriut po përballet me vështirësi të mëdha ekonomike pas mbylljes së kufijve të saj gjatë pandemisë, dhe Kim ka të ngjarë të shikojë furnizimet me ushqim dhe energji për t’u marrë me mungesat.
Ai gjithashtu ka të ngjarë të përdorë thellimin e lidhjeve me Moskën si një sinjal se vendi po lë pas vite të izolimit. Koreja e Veriut po përdor takimet me liderët botërorë për të theksuar “rolin e saj ndërkombëtar”, si dhe për qëllime propagandistike të brendshme.
Kim gjithashtu ka të ngjarë të kërkojë teknologji ruse për të mbështetur planet e tij për të ndërtuar sisteme armësh të teknologjisë së lartë si raketa të fuqishme me rreze të gjatë, armë balistike hipersonike, nëndetëse me energji bërthamore dhe satelitë spiunazhi, sipas Hong Min, një analist në Institutin Kombëtar të Koresë.
Moska tradicionalisht ka mbajtur rreptësisht sekret teknologjitë e saj më të rëndësishme të armëve, madje edhe nga partnerët kryesorë si Kina.
Sa mund të forcojnë marrëdhëniet dy vendet?
Ministri rus i Mbrojtjes Sergei Shoigu u tha gazetarëve të hënën se Rusia dhe Koreja e Veriut po shqyrtojnë stërvitje të përbashkëta ushtarake. Më herët, agjencia e spiunazhit të Koresë së Jugut kishte njoftuar se Shoigu duket se kishte propozuar një stërvitje trepalëshe që përfshin Kinën.
Në çdo rast, ato do të jenë stërvitjet e para të përbashkëta ushtarake të Koresë së Veriut me një vend të huaj që nga fundi i Luftës Koreane 1950-53.
Analistët besojnë se zgjerimi i bashkëpunimit të sigurisë Koreja e Jugut-SHBA-Japoni mund ta shtyjë Kim Jong Un të thyejë tabunë dhe të zhvillojë stërvitje të përbashkëta me Rusinë dhe Kinën për herë të parë.
Të tjerë argumentojnë se Koreja e Veriut ka të ngjarë ta refuzojë propozimin, pasi do të ishte një veprim që do të rriste varësinë e vendit nga Kina dhe Rusia. Park Won-gon, një profesore në Universitetin Wha Womans në Seul, beson se është shumë herët për të parashikuar se ku mund të çojë diplomacia e Kim.
“Në çdo rast, Koreja e Veriut dhe Rusia duhet të tregojnë se po bashkëpunojnë dhe se po e forcojnë atë bashkëpunim”, tha Park.
Udhëtimi i Shoigu në Phenian
Takimi me Putinin, nëse ndodh, do të ishte i pari i Kim me një udhëheqës të huaj që kur Koreja e Veriut mbylli kufijtë e saj në janar 2020. Të dy udhëheqësit u takuan për herë të parë në prill 2019, dy muaj pasi diplomacia e Kim-it me presidentin e atëhershëm të SHBA-së, Donald Trump, u rrëzua.
Shoigu udhëtoi për në Phenian në korrik dhe i kërkoi Kimit të dërgonte më shumë municion në Rusi, sipas zyrtarëve amerikanë.
Shoigu tha se Moska dhe Pheniani po konsideronin mbajtjen e stërvitjeve të përbashkëta ushtarake për herë të parë.
Rusia po kërkon të mposhtë kundërofensivën e Ukrainës dhe të zgjasë luftën, ndërsa Koreja e Veriut po rrit testet e saj raketore me një ritëm rekord në shenjë proteste ndaj lëvizjeve të SHBA-së për të forcuar aleancat ushtarake me Korenë e Jugut dhe Japoninë./Tema
Discussion about this post