Në një intervistë për mediat, ish-kandidati i PD, Fatbardh Kadilli është shprehur se do të marrë pjesë në të dyja Kuvendet që do të mbahen në dhjetor, ku njëri do të zhvillohet më 11 dhjetor dhe tjetri më datën 18.
Kadilli është shprehur se në Kuvend nuk shkon se është pro ish-Kryeministrit Sali Berisha apo pro Kryedemokratit Lulzim Basha, por shkon si mbështetës i demokratëve.
“Unë do të jem në të dy, apo të tre Kuvendet ku mblidhen demokratët, po ka një Kuvend me demokratë unë do jem se s’bën. Unë nuk shkoj si mbështetës i Berishës më 11 apo i Bashës më 18 por shkoj si mbështetës i demokratëve dhe si një njeri që dua t’u shpalos një vizion krejt të ri demokratëve, si në njërin Kuvend dhe në tjetrin, sepse unë nuk i ndaj dot demokratët në ca të Bashës dhe në ca të Berishës, po i ndamë kështu demokratët jenë më pak se sa janë sot. Kjo gjendje që ne kemi sot lidhet me atë se çfarë duhet të kishim zgjidhur më 26 Prill, jo me atë që filluam më 10 shtator. Ata që filluan më 10 shtator, filluan se ju prek Berisha. Unë dhe ata që filluan me 26, filluam se u prekën parimet dhe standardet e demokracisë në një parti” – thotë Kadilli.
Sipas tij, duhet të ndërtohet një PD e re që do i përgjigjet Shqipërisë, ndërkohë nga ana tjetër thekson se demokratët duan të jenë të bashkuar. Kadilli ka bërë këtë deklaratë bazuar në verifikimet që sipas tij ka bërë, ku mbi 30% e demokratëve kanë firmosur për të marrë pjesë në të dyja Kuvendet.
“Kjo parti ka nevojë për një përgjigje të re. As Kuvendet nuk do i japin përgjigje asaj që unë ngrita më 26 Prill. Po nuk zgjidhëm atë të datës 26 Prill ne do të vijmë në 26 prillin tjetër, e tjetër dhe përsëri nuk do ta zgjidhim. Duhet të bëjmë një PD të re që i përgjigjet Shqipërisë. Demokratët janë më të bashkuar. Nga verifikimet e mia në terren janë mbi 80% e demokratëve që kanë firmosur në të dyja, ata duan bashkimin, por nuk e gjejnë se busulle” – ka thënë Kadilli.
Discussion about this post