Ndezën zjarr dhe për pasojë u dogjën dy sipërfaqe me bimësi, falë reagimit të menjëhershëm dhe punës profesionale hetimore të shërbimeve të Policisë, identifikohen dhe procedohen penalisht dy autorët.
Ditën e djeshme, menjëherë pas marrjes së njoftimit për një zjarr në një masiv pyjor në fshatin Dovalan në Dibër dhe një tjetër zjarr në fshatin Miresh në Bulqizë, shërbimet e Policisë, kanë organizuar punën dhe menjëherë kanë shkuar në adresat e dhëna ku në bashkëpunim me shërbimin zjarrfikës, për shkak të terrenit të vështirë dhe kushteve atmosferike me erë të fortë, fikja e zjarrit është bërë e mundur pas disa orësh pune.
Në vijim të hetimeve të thelluara për të identifikuar dhe vënë përpara përgjegjësisë ligjore autorët e këtyre dy rasteve të zjarrvënies, mbështetur dhe në inteligjencë informative, specialistët për Hetimin e Krimeve të Komisariatit të Policisë Dibër dhe Bulqizë, referuan materialet procedurale në Prokurori, ku nisi procedimi penal për shtetasit:
Festim Tema, 54 vjeç, banues në fshatin Dovalan, Dibër
Kujtim Markja, 60 vjeç, banues në fshatin Miresh, Bulqizë.
Këta shtetas, kanë ndezur zjarr për djegien e barishteve në tokat e tyre, ku për shkak të erës që fryente, zjarret kanë dalë nga kontrolli dhe për pasojë u dëmtuan dy sipërfaqe toke me bimësi.
Drejtoria Vendore e Policisë Dibër, apelon për qytetarët që në asnjë rast të mos ndezin zjarre, pasi ky veprim përbën krim dhe ndëshkohet penalisht, si dhe i fton ata që të denoncojnë në numrin 112, çdo rast të tillë, me qëllim ndërhyrjen e menjëhershme për shuarjen e flakëve dhe procedimin penal të shtetasve përgjegjës.
Discussion about this post