Kreu i Fondit Shqiptar të Zhvillimit (FSHZH) Dritan Agolli shtron gostinë për 5 oligarkë duke u falur një super tender. FSHZH ka mbyllur më datë 1 shtator 2023 tenderin me objekt “Ndërhyrje në infrastrukturë rrugore Faza II”, me para që merren nga buxheti afatmesëm i shtetit 2023-2026. Ky është një projekt fantazmë pa shumë të dhëna konkrete, që do të zgjasë për dy vjet. Ndërkohë FSHZH u garanton që tani arkën plot me fonde oligarkëve, duke u dhënë mundësi të përfitojnë para edhe nga ky vit që jemi, kur kanë mbetur 3 muaj.
Sigurisht, duhej menduar një buxhet i lartë pasi në lojë janë përfshirë 5 oligarkët më të mëdhenj të tenderëve. Në dokument nuk përcaktohet se në cilat zona konkretisht do të bëhet ndërhyrje. Vetëm tregohet se do të bëhen gërmime dheu, arnime asfaltesh, rregullim i ndonjë shtylle korrenti apo tubacionesh. Këto janë punët e bashkive, që me të cilat po merret Agolli me nxitim, ndoshta i shqetësuar nga hetimet e SPAK-ut që kanë përfshirë edhe FSHZH-në.
E habitshme të shohësh se kanë marrë pjesë 24 kompani, por më datë 31 gusht 2023, Agolli me justifikime të ndryshme ka njoftuar përjashtimin nga gara për 19 firma.
Dhe ka lënë në garë vetëm 5 kompani që ishin paracaktuar si fituese.
Pra, këto firma nuk kanë garuar më mes tyre, por janë shpallur të gjitha fituese, çka tregon se në këtë tender kemi mungesë konkurrence.
Oferta më e shtrenjtë
Për këtë arsye Open Data Albania i ka dhënë “Flamurin e Kuq”, ndërsa thekson që këta fitues kanë patur ofertat më të shtrenjta, duke shkelur atë pikë të ligjit që kërkon vlerësimin e ofertave më të lira.
Në dokument shohim se 5 kompanitë që përfitojnë në këtë tender janë “A. N. K.”, “FUSHA”, “G.P.G. COMPANY” shpk, bashkimi i operatorëve “ALB TIEFBAU” dhe “ERAL CONSTRUCTION COMPANY”, si dhe bashkimi i operatorave“2 T” shpk &BE – IS” SH.P.K.
Dhe secila prej tyre ka patur ofertë shumë më të shtrenjtë se sa 15 kompani të tjera që u përjashtuan nga Dritan Agolli.
Konkretisht; “A. N. K.” Kërkoi 361.176.985 lekë pa tvsh, firma “G.P.G. COMPANY” 363.268.710 lekë pa tvsh. Ndërkohë BOE “ALB TIEFBAU” & “ERAL CONSTRUCTION COMPANY” shpk, paraqitën ofertën me vlerë 367.187.225 lekë pa tvsh .
Firma e njohur për afera “FUSHA” shpk kërkoi 375.000.000 lekë pa tvsh . Dhe bashkimi i operatorëve “2 T” shpk & “BE – IS” SH.P.K paraqitën ofertën me vlerë 387.277.388,95 lekë pa tvsh.
Vlen të theksojmë se me këto kërkesa ata mund të ndikojnë që në vitet në vijim të shtohet fondi për këto projekt. Këtu tregohet se alarmi i Open Data Albania duhet të merret sa më shpejt në konsideratë nga KPP, Kontrolli i lartë i Shtetit apo SPAK.
5 oligarkët që përpinë fondin
Sikur e cekëm më lartë, ky tender është dhuruar tek 5 firma që drejtohen nga biznesmenë shumë pranë qeveritarëve.
Përmendim të parin Shkëlqim Fushën, i firmës Fusha SHPK. Ai njihet për tenderët në Unazën e Madhe, tenderin për Piramidën, Teatrin dhe shumë afera të tjera të mëdha.
Kompania A. N. K. drejtohet nga Agim Kola. Ai zotëron edhe dy firma të tjera. Bëhet fjalë për RSM Company SH.P.K. dhe A. N. K. Shpk, përmes të cilave ka fituar shumë tenderë, të gjitha të mbushura me abuzime. A. N. K. Shpk njihet më së shumti për mega aferën që bëri me punimet ne aksin Milot-Balldren. Bëhet fjalë për koncesionin me vlerë 255 milionë euro.
P. G. COMPANY është në pronësi të Paqsor Buzit, i njohur për mashtrim dhe vjedhje fondesh.
Në vitin 2019, Buzi është arrestuar nga policia si i dyshuar për pjesëmarrje në një skemë të mashtrimit me Tatimin mbi Vlerën e Shtuar.
Ai u arrestua bashkë me disa biznesmenë të tjerë me akuzat e “krijimit të skemave mashtruese me TVSH”, “falsifikimit” dhe “fshehjes së të ardhurave”. Këta të ashtuquajtur biznesmenë, u akuzuan në atë kohë se kishin krijuar një skemë me fatura fiktive shitje-blerjesh mes njëri-tjetrit me qëllim përfitimin e TVSH-së nga shteti.
Ndërsa pronari i firmës “2 T” shpk është Artan Sako, vëllai i komandantit të Gardës, Gramoz Sako.
Emri i tij është lakuar në super projektet e ndërtimit, për infrastrukturën rrugore dhe mirëmbajtje. BE – IS SH.P.K është në pronësi të Hamza Islamajt, i cili është përfshirë në disa projekte korruptive edhe përtej kufijve me biznesmenin Gentjan Sula.
Tenderi Denoncohet
Duke u munduar të kënaqë këta oligarkë, Agolli ka lënë jashtë loje disa biznesmenë të tjerë të fuqishëm dhe njëri prej tyre nuk ka heshtur. Më datë 7 shtator 2023, bashkimi i operatorëve “Curri” SHPK & “SMO Union” kanë denoncuar në KPP Agollin për këtë tender. Ata hedhin poshtë justifikimet e tij se oferta e tyre nuk plotësonte kushtin për vërtetimin se ka kryer punë të tjera të ngjashme me vlera të tilla.
“Konkretisht në ankesë ngrihen pretendime mbi arsyen e skualifikimit si më poshtë vijon.
Bashkimi i operatoreve ekonomik “SMO Union” shp.k & “Curri” sh.p.k nuk plotëson Kriterin për kapacitetin teknik pika 2.3.1. te Kritereve te veçantë ne DT për objektin Ndërhyrje në infrastrukturë rrugore Faza II “ për sa i përket “Përvojës së suksesshme ne realizimin e punëve te ngjashme” a) Punë të ngjashme për një objekt të vetëm në një vlerë jo më të vogël se 50% e vlerës së për llogaritur të kontratës që prokurohet, të realizuar nga operatori ekonomik”, theksohet në dokument.
Sipas denoncuesve, Agolli as nuk i ka shqyrtuar ofertat e tjera por ka përzgjedhur firmat fituese sipas dëshirës. Na mbetet të shohim vendimin e KPP për këtë çështje: Nëse i jepet e drejta kompanisë “Curri” SHPK & “SMO Union”, atëherë lufta mes ujqërve të tenderëve do të nisë nga e para.
Lexo edhe: Shehi paralajmëron: Teuta s’është ajo e vitit të shkuar, fusha nuk…
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post