Kosova do të ndeshet këtë të shtunë, përballë Zvicrës, në atë që shihet nga shumë tifozë, si një “derbi”, prej faktit se te helvetët, luajnë shumë futbollistë me origjinë nga Kosova. Një prej tyre është pa diskutim, një nga shqiptaro-zviceranët më të famshëm.
Granit Xhakën e pret një nga ndeshjet më të veçanta të karrierës të shtunën mbrëma teksa mesfushori do të zbresë në fushën e stadiumit Fadil Vokrri përballë “dardanëve”.
Në një prononcim për median sportive “SuperSport Kosova”, Xhaka theksoi se për të nuk është aspak e lehtë të luajë kundër vendit të tij ndërsa shtoi se ai kombësinë shqiptare nuk e ka mohuar kurrë.
“Hera e parë kundër Kosovës në Prishtinë nuk krahasohet me miqësoren, jemi përgatitur mirë. Një ndeshje mjaft e veçantë dhe të shohim çfarë do të ndodhë. Shpresoj që tifozët të më presin mirë, shqiptarët e dinë mirë se çfarë bëjmë ne për shqiptarët, kurrë nuk e mohojmë që jemi shqiptarë.
Nuk është e lehtë të luash kundër vëllait (ndeshja me Shqipërinë, në Euro 2016, ku për kuqezinjtë luante Taulant Xhaka) dhe vendit tënd, të gjithë familjen e kam këtu, e ndjej veten shqiptar. Jemi përgatitur mirë, Kosova ka kualitet, por të shohim. Më kanë kërkuar shumë bileta, kam porositur 40 bileta që janë nga ana ime”, u shpreh futbollisti i Bayer Leverkusen.
Discussion about this post