Ka nisur në Kuvend interpelanca që ka thirrur deputeti i Partisë Demokratike Tritan Shehu, me kryeministrin Edi Rama sa i takon procesin të “Open Balkan”.
Nga foltorja e Kuvendit, Shehu hodhi akuza ndaj Ramës, se ky proces është duke realizuar ëndrrën e kahershme të Vuçiç për Serbinë e madhe, përmes idesë së tij për të shkëmbyer territoret e Kosovës.
“Jam dakord se kjo iniciativë nuk u bë brenda zyrave të PS apo në Ministrinë e Jashtme. Ajo nuk u përgatit as me ndërmjetësimin e ndërkombëtarëve. U ndërtua mbi bazë nacionalizmi, me vizionin gjeopolitik të Serbisë, në zyrat e Vuçiç. Në fakt është e montuar si një ngrehinë e përbashkët me ide serbe. Kemi të bëjmë me një mbivendosje të të dy projekteve, atë të Serbisë së Madhe mbi një Jugosllavi të re. Ju zoti kryeministër u bëtë mbështetës i kësaj nisme. Koha i dha asaj një ngjyre të rrezikshme, jo vetëm për Prishtinën, por me hapjen e historisë me ‘tretjen’ e Kosovës. Ju zoti kryeministër u përfshirë në një projekt të rrezikshëm dhe jo të realizueshëm. U përfshirë në një nismë me një Kosovë të pabarabartë. Aq shumë u involvuat ju në këtë projekt së bashku me Vuçiç, ku ju u shpërblyet me duartrokitje në parlamentin e Serbisë. Por me siguri nuk do të ndodhte e njëjta gjë në Kuvendin e Kosovës, Malit të Zi, Bosnje Hercegovinës dhe ndoshta as në Kuvendin e Maqedonisë pas dorëheqjes së Zaev”, tha Shehu.
Sipas Shehut, kjo nisëm është një dështim gjë që sipas e tij u vërtetua kur partia e Zoran Zaev humbi zgjedhjet lokale. Ky i fundit, ishte gjithashtu iniciator i “Open Balkan”.
“Kjo nismë është një dështim, pasi e patë rezultatin që dhanë zgjedhjet në Maqedoni, madje u braktise dhe nga Vuçiç, i cili shkoi në Rusi dhe ju la vetëm ju në konferencë. Shkoi atje për të marrë garancitë e Rusisë dhe Kinës për përplasjen me Kosovën”, u shpreh Shehu.
Discussion about this post