Në qendrën e qytetit të Fushë-Krujës, deputetja 22-vjeçare, Andia Ulliri, e cila doli nga ky qytet, ka mbajtur premtimin e saj në fushatën elektorale, për hapjen e zyrës në shërbim të qytetarëve. Në ceremoninë e organizuar merrnin pjesë demokratë dhe qytetarë nga Fushë-Kruja, ndërsa asistuan dhe deputetet Flutura Açka dhe Eralda Tase Bano.
Në këtë ceremoni modeste, Andia Ulliri uroi mirëseardhjen në përurimin e zyrës, dy kolegëve të saj dhe banorëve të Fushë-Krujës, duke i falenderuar për bashkëpunimin. Deputetja Andia Ulliri ka shtuar më tej, sehapja e kësaj zyre, ka ardhur, pasi shumë qytetarë dhe demokratë e kanë gjetur veten të humbur, pa një derë se ku të trokasin. “Me premtimin se një ditë, nëse do bëhesha deputete, me patjetër, qytetarët do të kishin derën e tyre për të trokitur u votova nga ju, ndaj sot u çel një derë. Zyra, besoj është ajo derë që do të bashkojë, jo vetëm demokratët e Fushë-Krujës, por të gjithë qytetarët që kanë shqetësime dhe unë do t’i pres kurdo dhe në çdo kohë”, u shpreh deputetja.
Ndërsa Flutura Açka, deputete e PD në parlamentin shqiptar, tha se ndihet e nderuar që ndodhet në Fushë-Krujë mes demokratëve dhe për herë të parë pas kaq javësh të shqetësuara nuk dëgjon pyetjen “a je me Bashën apo me Berishën?”. “Sinqerisht, jam shumë e lumtur që gjendem mes kaq demokratëve, kur mendon se demokratët janë të përçarë, por në të vërtetë, ata e shpjegojnë me buzëqeshje, me prani se sa e rëndësishme është partia e tyre. Ajo që i bashkon janë idealet dhe demokracia, që do të thotë se pavarësisht betejës së pabarabartë që kishim në zgjedhjen e 25 prillit, demokratët do të vazhdojnë betejën sëbashku”, tha Açka.
Sipas saj, zyra e hapur nuk është zyra e saj, por demokratët do ta shohin si zyra dhe streha e tyre, ku të kenë mundësi, të takohen, të thonë fjalën e tyre të lirë, të mendojnë si të jemi bashkë dhe kjo zyrë do mbetet shtëpia dhe streha e tyre. “Besojmë se do ta shoqërojnë dhe shumë streha të kolegëve të Andias. Personalisht me Adia Ullirin jam takuar në këtë legjislaturë dhe kam parë një vajzë të re, të brishtë, të qetë dhe të mençur, një vajzë që di të dëgjojë, që ka dëshirë të këshillohet dhe ne për të tillë njerëz kemi nevojë, për gjakun e ri, frymën e re ne PD. Uroj demokratët e Fushë-Krujës dhe çdo demokrati që këtë betejë të turbullt, ta kalojmë sa më shpejt dhe të jemi bashkë në beteja të ardhshme”, përfundoi Açka.
Gjatë takimit kanë folur dhe demokratë, të cilët shpresojnë në të ardhme më të sigurt të PD-së dhe falenderimi i tyre është për deputeten Andia Ulliri, e cila deri tani është gjendur pranë demokratëve dhe qytetarëve të Fushë-Krujës.
Discussion about this post