Mbrëmjen e djeshme, në Vlorë, u ekzektua me breshëri automatike, 41-vjeçari Leartiad Lekaj (Kekaj). Sipas njoftimit zyrtar nga Policia, ngjarja ndodhi rreth orës 21:50, në lagjen “29-Nëntori”, në rrethana ende të paqarta.
Viktima ishte duke udhëtuar me motor, kur është qëlluar me armë zjarri nga një person i maskuar, i cili ndodhej në një makinë.
Duket se edhe në vrasjen e djeshme, autori/ët e dyshuar kanë përdorur të njëjtën skemë: pas ekzekutimit të objektivit, djegin makinën dhe më pas largohen.
Makina “Audi” që dyshohet se është përdorur për krim është gjetur bashkë me kallashnikovin brenda totalisht e shkrumbuar në fshatin Kotë në Vlorë. Sipas raportimeve, automjeti do ti nënshtrohet ekspertizës, edhe pse ka shumë pak shanse për gjetje gjurmësh, për shkak se ai pothuajse është shkrumbuar.
“Nga kontrolli i zonës, në aksin rrugor “Kotë- Sevaster”, shërbimet e Policisë kanë konstatuar një automjet tip “Audi”, duke u djegur”, sqaroi policia në njoftimin zyrtar.
Nuk dihet nëse autorët janë larguar me një tjetër automjet, ndërsa policia njoftonte se kishte ngritur grupe kontrolli në hyrje/daljet e qytetit të Vlorës dhe në akset “Vlorë-Fier”, “Vlorë-Tepelenë” dhe “Vlorë-Himarë”.
Discussion about this post