Kryente punime pa leje në lokal, nën hetim 58-vjeçari

Një person është arrestuar nga policia e Korçës, dhe dy të tjerë janë proceduar penalisht pasi akuzohen për vepra të ndryshme penale.

Uniformat blu njoftojnë se një 37-vjeçar është arrestuar, pasi në aksin rrugor Kapshticë-Bilisht, është kapur në flagrancë duke drejtuar mjetin tip “Seat”, në gjendje të dehur.

Gjithashtu, është proceduar penalisht një 58-vjeçar, banues në Pogradec, për ndërtim të paligjshëm, pasi ka kryer punime në ambientet e lokalit të tij, në kapërcim të lejes së dhënë nga Bashkia Pogradec.

Një tjetër person është proceduar penalisht pasi u kap me mjetin tip “Ford” duke transportuar një sasi dru zjarri pa lejen përkatëse. Materialet i kaluan Prokurorive së Rretheve Gjyqësore Korçë e Pogradec për veprime të mëtejshme.