Gazment Bardhi ka deklaruar në nisje të seancës së sotme plenare se Presidenti Bajram Begaj ka shkelur kushtetutën.
Kjo pasi sipas Bardhit, presidenti ka sjellë në Kuvend dekretin për miratimin si Ministër i Financave të Ervin Mete, ende pa e shkarkuar nga posti si drejtor i AMF.
“Në fakt ju sapo votuat dekretin 199 dt 9/9.23 për emërimin e ministrit të Financave për Republikën e Shqipërisë, i cili është në kundërshtim flagrant me Kushtetutën e Republikes së Shqipërisë.
Në kundërshtim flagrant, me nenin 103 , Presidenti i Republikës ka dekretur në pozicionin e ministrit një zyrtar publik i cili nuk mund të emërohej për shkak të ushtrimit të një funksioni tjetër publik, pranë AMF-së. Siç opinioni publik është dëshmitar, shkarkimi i z. Ervin Mete është bërë në seancën e të hënës, pasi presidenti i Republikës në kundërshtim me kushtetuën kishte bërë dekretimin e tij si ministër.
E sjell në vëmendje sepse duhet të ishit ju që ti kishit kujtuar Presidentit se ka sjellë në Kuvend një ministër në kundërshtim me Kushtetutën. Kjo i tregon gjithë opinioni publik se për fat të keq Presidenti ka bërë një dekretim pa kryer as verifikimin formal për mbushjen e kritereve nga anëtarët e Këshillit të Ministrave. I sjell në vëmendje seancës plenare që sapo ka votuar pro një dekret antikushtetues të Presidenit të Republikës.”- tha Bardhi.
Discussion about this post