OKB: Nëse do kishte evakuim në Libi, s'do vajtonim kaq shumë vdekje -

OKB: Nëse do kishte evakuim në Libi, s’do vajtonim kaq shumë vdekje

në Botë, Lajme

Kohë leximi: 2 min

Një pjesë e madhe e Libisë mbetet e zhytur nën ujë me numrin e të vdekurve në rritje vazhdimisht dhe Kombet e Bashkuara dërgojnë mesazhin se kaq shumë vdekje nga përmbytjet mund të ishin shmangur nëse autoritetet do të kishin vazhduar në kohë me operacionet e evakuimit.

Zyrtarisht, të vdekurit llogariten në mbi 5.000, ndërsa të paktën 10.000 të tjerë janë të zhdukur. Vlerësimet, megjithatë, flasin për një numër shumë më të madh viktimash se sa është regjistruar.

Një zëdhënës i Kombeve të Bashkuara, meteorologu finlandez dhe Sekretari i Përgjithshëm i Organizatës Botërore Meteorologjike, Petteri Talas, u tha gazetarëve se shteti libian mund të kishte lëshuar paralajmërime të zgjeruara.

“Nëse civilët do të ishin evakuuar me kohë, ne nuk do të kishim vajtuar kaq shumë viktima”, tha ai për AFP.

Megjithatë, fakti që Libia është në krizë të thellë politike dhe sociale, pasi qeveriset nga dy qeveri ndërluftuese, e bën edhe më të vështirë koordinimin në raste të tilla emergjente.

Vihet re se çdo qeveri propozoi masa të ndryshme për të përballuar përmbytjet e shkaktuara nga stuhia Daniel që goditi vendin e Afrikës Veriore.

Në të njëjtën kohë, fakti që në qytetin e Dernës, që i ngjan një varreze të madhe, të vdekurit mund të arrijnë deri në 20 mijë, siç thotë kryebashkiaku i qytetit, po shkakton tronditje globale.