Kolegji Zgjedhor vendosi sot që Partia Demokratike e drejtuar nga Lulzim Basha do të ketë dy komisionerë në zgjedhjet e pjesshme vendore në Kukës, që do të mbahen më 24 shtator, edhe pse ky subjekt politik nuk do të garojë me ndonjë kandidat.
Por Kolegji në vendimin e tij e konsideron PD e Bashës si partinë më të madhe të opozitës, edhe pse në 14 maj, ajo numëron rreth 100 mijë vota, më pak se gjysma e votave që ka marrë koalicioni “Bashkë Fitojmë” që drejtohet nga Sali Berisha e Ilir Meta.
Në një postim në rrjetet sociale, Indrit Sefa, sekretar për Çështjet Ligjore në PD-në e Bashës, e konsideroi vendimin e Kolegjit si një fitore për demokratët.
“Demokratë gëzohuni, fitorja e sotme në Kolegjin Zgjedhor është e juaja dhe për ju.
Së pari më duhet të bëj një shpjegim për injorancën juridike që ka mbuluar këtë betejë të fituar të Partisë Demokratike në Kolegjin Zgjedhor.
Fitorja e sotme nuk kishte të bënte vetëm me zgjedhjet e pjesëshme në Kukës por për zgjedhjet e përgjithshme vendore të vitit 2027.
Komisioneri (Z.Celibashi) dhe KAS kishin vendosur që në zgjedhjet vendore të vitit 2027 PD do të duhet të kishte vetëm një anëtar KZAZ dhe rrjedhimisht 1 anëtar ne KQV. Partia Demokratike nuk mund të lejonte kurrësesi që bashkimi i halleve të NON GRATAVE që duan ti cojnë demokratët te LSI (PL) të zyrtarizohej ligjërisht.
Demokratë fitorja është e juaja dhe për ju sepse në zgjedhjet vendore të vitit 2027 Partia Demokratike do të ketë komisionerët e saj siç i ka pas gjithmon dhe kjo është një humbje për LSI (PL) dhe jo për ju.
Miqtë e mi mos bini pre e retorikës së atyre që duan tju çojnë në krahët e Ilir Metaj-t, ju keni shtëpinë tuaj dhe kontributi juaj është i vlerësuar vetëm në shtëpinë tuaj. Neveritini të gjithë ata që duan t’ju përdorin si mall shkëmbimi për të mbyllur hallet e tyre.
Partia Demokratike ka qënë, është dhe do të jetë gjithmon shtëpia juaj”, shkruan Sefa.
Discussion about this post