Njohja e sigurimeve shoqërore për qytetarët e Kosovës dhe Shqipërisë dhe për të përfituar më pas një pension ishte një nga marrëveshjet e firmosur në mbledhjen ndërqeveritare të 26 nëntorit në Elbasan.
Po si do funksionojë skema dhe cila do jetë procedura që do ndiqet nga qytetarët? Lidhur me këtë ka folur drejtori i Përgjithshëm i Institutit të Sigurimeve Shoqërore, Astrit Hado. Ai tha se pavarësisht ku ka punuar një person në Kosovë apo Shqipëri, vitet do t’i përllogariten të gjitha.
“Marrëveshja bashkon të gjithë periudhat e punës, pavarësisht se ku ka ndodhur, dhe i konsideron si të ishin kryer në Shqipëri”, thotë Hado.
Mirëpo, që të mund të përfitojnë, qytetarët e dy vendeve shqipfolëse do duhet të presin ende, pasi marrëveshja duhet të votohet nga të dy parlamentet. “Marrëveshja është miratuar në parim në Qeveri, do të kalojë në parlamentet respektive, dhe më pas do të duhet koha teknike e shkëmbimeve”, thotë ai. Ndërsa qytetarët kërkojnë që kjo marrëveshje të arrihet sa më parë.
Discussion about this post