SPAK dërgon për gjykim dosjen e Lefter Allës

në Aktualitet

Kohë leximi: 2 min

Prokuroria e Posaçme SPAK dërgon për gjykim dosjen për ish-kryetarin e Bashkisë së Bulqizës, Lefter Alla.

Ish-kryebashkiaku i Bulqizës, Lefter Alla u arrestua me urdhër të SPAK.

Përveç tij, nën masën e arrestit me burg janë edhe 10 persona. Ndërsa për dy të tjerë është kërkuar masa e arrestit në shtëpi. SPAK ka dërguar për gjykim edhe ish-zyrtarët e tjerë të bashkisë.

SPAK po heton që prej vitit të kaluar në bashkëpunim me policinë dhe rezulton se janë konsumuar veprat penale “Shkelja e barazisë së pjesëmarrësve në tendera apo ankande publike”,“Shpërdorimi i detyrës”, “Falsifikimi i dokumenteve”, “Falsifikim i formularëve. Në funksion të hetimeve të këtij procedimi penal janë përdorur mjete dhe metoda speciale hetimi veç atyre tradicionale.

Prokuroria e Posaçme thotë se ekziston dyshimi i arsyeshëm, i bazuar në prova, se kryebashkiaku i Bulqizës ka shkelur barazinë në tendera dhe ankande publike dhe ka shpërdoruar detyrën. Nga hetimi ka rezultuar se për Lefter Allën evidentohet qartësisht se ka shkelur procedurat e prokurimit publik të 30 prillit 2021 për ndërtimin e rrjetit të furnizimit dhe të shpërndarës së ujësjellës-kanalizimeve, në Lagjen e Vjetër të qytetit të Bulqizës.

Kryebashkiaku së bashku me zyrtarë të tjerë përgjegjës të bashkisë kanë krijuar avantazhe gjatë procedurës së prokurimit në mënyrë që garën ta fitonte kompania që donin ata. Por, ka dhe më shumë se kaq në konkluzionet e SPAK. Të hetuarit me veprime aktive, jo vetëm kanë ngritur një mekanizëm të posaçëm për të favorizur një firmë pjesëmarrse në tender, por kanë zbuluar se firma pjesëmarrëse në prokurim paraqiste vetëm dokumetacionin, ndërkohë punimet realizoheshin nga i hetuari Aqif Konesha, i cili rezultoi lidhje e afërt e kryetarit të bashkisë, Lefter Alla.

Tre vjet më parë, Alla u hetua nga SPAK për “prodhim dhe mbajtje të lëndeve narkotike”, hetim që nisi pas publikimit të një videoje, ku pretendohej se shfaqej krybashkiaku duke konsumuar kokainë. Në kuadër të hetimit, Alla iu nënshtrua dhe testit të drogës, prej nga rezultoi se nuk ishte përdorues i lëndëve narkotike dhe më pas hetimi i nisur u pushua.