Lulzim Bashës, i cili ka marrë drejtimin e PD-së zyrtare, duket se nuk i del inati me Gazment Bardhin, një prej bashkëpunëtorëve të tij më të afërt për të paktën 5 vite, por që së fundmi është rreshtuar në “grupin armiqësor” nga ata që njihen si grupimi i vulës.
Pas përplasjeve në Kuvend lidhur me atë se kush do të jetë kryetari i Grupit Parlamentar të PD-së, por edhe faktit se grupimi i drejtuar nga Gazment Bardhi nuk njeh asnjë nga proceset e organizuara nga Lulzim Basha, që nga zgjedhja e kryetarit dhe më pas anëtarëve të Kryesisë, Sekretariatit dhe anëtarëve të Këshillit Kombëtar, së fundmi përplasja është shtrirë në rrjetet sociale.
Lulzim Basha ka marrë nën kontroll grupin e whats app, që deri dje shërbente për komunikimin mes deputetëve të PD-së, ku natyrisht nuk bënin pjesë ata që ishin përjashtuar nga Basha gjatë përplasjes me Berishën, por pjesë e këtij rrjeti ishin Gazment Bardhi dhe 19 deputetët që e mbështesin atë.
Së fundmi, përmes Endri Hasës, Gazment Bardhi është përjashtuar nga ky grup komunikimi, ndërsa nuk lejohet që deputetët të komentojnë mes tyre.
Njoftimet mund të bëhen vetëm nga administratori i grupit dhe askush tjetër nuk mund të shkruajë.
Veprimi duket si një “hakmarrje” fëmijësh, që në fund të ditës nuk ndikon aspak te asnjë nga grupimet e deputetëve, përsa kohë secili prej tyre mund të hapë një grup ëhats app dhe të njoftojë, debatojë, komunikojë, shkëmbejë mendime etj.
Discussion about this post