Gjykata e Posaçme Anti-Korrupsion nis këtë të hënë gjyqin për kryebashkiakun e zgjedhur të Himarë, Fredi Belerit, i cili kërkon fillimisht lehtësimin e masës “Arrest me burg”.
Ai ka kërkuar gjithashtu leje për të bërë betimin para popullit të Himarës.
Para nisjes së seancës në ambientet e GJKKO-së është edhe ambasadorja greke Konstantina Kamits për të ndjekur nga afër këtë seancë të parë mbi çështjen e Fredi Belerit.
Dhe pak minuta pas saj, në GJKKO ka mbërritur edhe kreu i Partisë Bashkimi për të Drejtat e Njeriut, Vangjel Dule.
Kryebashkiaku i zgjedhur i Himarës mbahet në burg prej 10 Majit të këtij viti, pasi u kap duke blerë vota.
Pavarësisht se ka kërkuar disa herë masë të më lehtë sigurie, GJKKO nuk e ka pranuar.
Kujtojmë se shteti grek po lobon fort për të nxjerrë nga burgu Belerin, duke çuar edhe një amendament në Parlamentin Europian për lirimin e tij.
Kjo nuk është hera e parë që ambasadorja greke bën lëvizje të tilla, pasi më herët e ka vizituar Belerin si në paraburgimin e Vlorës, ashtu edhe në burg, pas vendimit të GJKKO-së ndaj tij.
Ndërkaq gjyqi ndaj Belerit nis vetëm një ditë pas deklaratave të kryeministrit të Greqisë Kyriakos Mitsotakis, i cili gjatë një konference për shtyp, në Panairin e 87-të Ndërkombëtar të Selanikut tha se nuk do të ndalonte së ngrituri këtë çështje dhe veçanërisht për faktin se autoritetet shqiptare nuk po e lejonin Belerin të ushtronte të drejtën e tij për t’u betuar si kryetar i zgjedhur i Himarës, për të cilën ai tha se ishte një shkelje e shtetit ligjor.
Discussion about this post