Zjarri në pallatin 10 katësh, ngjarja referohet si aksidentale. Çfarë pritet

Ngjarje aksidentale e ka klasifikuar Policia e Tiranës zjarrin që përfshiu pallatin 10 katësh në zonën e ish-Parkut në kryeqytet.

Sipas raportimeve, Policia e Tiranës ka referuar në Prokurori ngjarjen e ndodhur pak ditë më parë, ku si pasojë e një shkëndije elektrike në kondicionerin e katit të fundit ka shpërthyer flaka, e cila u përhap në të gjithë fasadën e pallatit, duke djegur plotësisht 3 apartamente dhe një tjetër u dogj pjesërisht.

Nuk dihet nëse deri në përfundim të hetimeve do të qëndrojë ose jo ky variant mbi shkakun e zjarrit, ndërkohë që ditën e ngjarjes edhe Bashkia e Tiranës tha se do të hetonte lidhur me atë që kishte ndodhur.

Burime nga policia thonë se në vijim po priten autorizime nga Prokuroria për të vijuar me marrjen në pyetje edhe të personave të tjerë, përfshirë këtu ndërtuesin e pallatit Tanush Mëhillaj.

Sipas raportimeve, policia akoma nuk ka në dorë akt-ekspertimin e analizës së llojit të materialit që është veshur fasada e jashtme e pallatit, e cila rezultoi fatale për përhapjen e zjarrit.