Gazment Bardhi, kreu i Grupit Parlamentar, denoncoi nga salla e Kuvendit, atë që e quajti si pazar mes anëtarëve të Gjykatës Kushtetuese dhe anëtarëve të Qeverisë Rama.
Megjithëse Kuvendi shtyu diskutimet dhe votimin e ligjit për rritjen e pagave të anëtarëve të Kushtetueses, Bardhi tha se nëse kjo mazhorancë ka respect për këtë Gjykatë, atëherë minimalisht duhet të zbatojë vendimet e saj.
“Zbatoni vendimet e Gjykatës Kushtetuese, si në rastin e Olta Xhaçkës. Po ju nuk doni të zbatoni vendimet, ju po i afroni karamele anëtarëve të Kushtetueses, po jepni një mesazh mafioz për të gjithë sistemin e drejtësisë.
Po ju them që propozimi që ka ardhur në Kuvend është një pazar, mes anëtarëve të Qeverisë dhe anëtarëve të caktuar të Kushtetueses, që do ua zbardh në momentin e duhur kur të diskutohet ky ligj.
Doni ju që anëtarët e Kushtetueses të kenë pagat 7 milion në muaj, atëherë bëjini rrogat e anëtarëve të SPAK dhe GJKKO 10 mln në muaj, pasi janë më të kontrolluarit në të gjithë sistemin e drejtësisë, dhe pastaj ejani dhe kërkoni votat për të rritur pagat e anëtarëve të Kushtetueses”, tha Bardhi.
Discussion about this post