Qytetarët e Kukësit i drejtohen të dielën kutive të votimit, në zgjedhjet e pjesshme për zgjedhjen e kryebashkiakut të ri.
Kjo e shtunë shënon heshtjen zgjedhore, ndërsa gjithçka është gati për rivotimin ditën e diel.
Janë në total 45 mijë 946 qytetarë me të drejtë vote, që të dielën i drejtohen kutive të votimit në 74 qendra votimi. Ata do të kenë vetëm një fletë votimi, ku do të jenë të renditur dy kandidatët e vetëm në garë. Numrin 1 e mban Albert Halilaj i socialistëve, ndërsa numrin 2, Emri Vata i koalicionit “Bashkë fitojmë”.
Të gjitha qendrat e votimit do të merren nën ruajtje nga Policia e Shtetit që do të angazhohet për mbarëvajtjen e këtij procesi deri tek shoqërimi dhe dorëzimi i kutive pranë qendrës së numërimit të votave dhe përfundimin total të procesit.
518 komisionerë do të administrojnë procesin zgjedhor. Grupi i Lulzim Bashës ka 146 komisionerë. Pavarësisht se u regjistrua në KQZ si subjekt zgjedhor nuk garoi me kandidatë për kryetar bashkie.
Koalicioni “Bashkë fitojmë” ka vetëm një anëtar në KZAZ e në komisionet e qendrave të votimit dhe 73 komisionerë, kurse Partia Socialiste ka 292 komisionerë.
Discussion about this post