Ish-drejtori i burgut të Lushnjës, Judmir Shurdhi është vendosur në prangat e policisë.
Judmir Shurdhi është dënuar me 1 vit e katër muaj burg nga Gjykata Kundër Krimit dhe Korrupsionit të Organizuar (GJKKO).
Ai është shpallur fajtor për veprat penale shpërdorim detyre dhe shkelje e barazisë në tendera.
Ish-drejtori i burgut “Kosova” të Lushnjës akuzohet se bashkë me vartësit e tij shkelën procedurat për tenderin e përcaktuar për transportin e gardianëve të burgut.
Sipas SPAK Shurdhi i cili ka mbajtur detyrën e drejtorit të burgut në vitin 2020, kohë kur daton shkelja në fjalë ka shpërdoruar detyrën lidhur me zhvillimin e tenderit për transportin e punonjësve pasi ka ngarkuar të njëjtët persona të jenë në cilësinë e anëtarit të Njësisë së prokurimit dhe Komisionit të vlerësimit të ofertave.
Ai kishte miratuar shkeljet ligjore të kryera prej tyre, si në vitin 2018 ashtu edhe në vitin 2019, si dhe kishte ushtruar presion për kualifikimin e një operatori që mori pjesë në garë.
Judmir Shurdhi u arrestua në vitin 2019 bashkë me vartësin e tij Llazar Mino, pasi liruan nga burgu 4 muaj e 22 ditë para kohe, Lulzim Cakën, i dënuar për një sërë veprash të rënda penale.
Njoftimi i policisë
Vijon puna për kapjen e shtetasve të shpallur në kërkim kombëtar.
Finalizohet operacioni policor i koduar “Takimi i fundit”, për kapjen dhe vënien në pranga të një 43-vjeçari të dënuar me burgim për veprën penale ”Shkelja e barazisë së pjesëmarrjes në tendera apo ankande publike”.
Specialistët për Hetimin e Krimeve të Komisariatit të Policisë Lushnjë, në vijim të punës për kapjen e shtetasve në kërkim dhe vënien e tyre përpara përgjegjësisë penale, finalizuan operacionin policor të koduar “Takimi i fundit”, si rezultat i të cilit u bë kapja dhe ndalimi i shtetasit:
Judmir Shurdhi, 43 vjeç, banues në Lushnjë.
Gjykata e Posaçme e Shkallës së Parë kundër Korrupsionit dhe Krimit të Organizuar, Tiranë, me vendimin e datës 07.12.2022, e ka dënuar këtë shtetas, me 1 vit e 4 muaj burgim, për veprën penale “Shkelja e barazisë së pjesëmarrjes në tendera apo ankande publike”, kryer në bashkëpunim.
Ky shtetas, në periudhën 2020-2021, gjatë së cilës ka qenë drejtor në burgun e Kosovës, Lushnjë, në bashkëpunim me shtetas të tjerë, ka kryer veprime që përbëjnë shkelje të barazisë së pjesëmarrjes në tendera apo andande publike.
Materialet procedurale i kaluan Prokurorisë pranë Gjykatës së Posaçme kundër Korrupsionit dhe Krimit të Organizuar Tiranë, për veprime të mëtejshme
Discussion about this post