Pamje nga “ferri” i 22-vjeçares shqiptare në Greqi

Janë publikuar pamjet nga shtëpia e 22-vjeçares që dhunohej nga bashkëshorti shqiptar në Volos të Greqisë.

Sipas mediave të huaja, në këtë banesë në Alykes, 22-vjeçarja u torturua për dy vite të tëra nga bashkëshorti i saj 28-vjeçar, i cili u arrestua.

Gjithashtu janë bërë publike edhe dëshmitë e fqinjëve të çiftit me origjinë shqiptare.

“Nuk e kemi parë kurrë gruan. E dinim që këtu jetonte një çift shqiptar, por këtë vajzë nuk e kishim parë kurrë. Të gjithë pyesnim se çfarë po ndodhte brenda asaj shtëpie, por nuk mund të bënim asgjë. Nuk e dinim se çfarë po ndodhte”, thotë një grua.

Një fqinj tjetër rrëfen: “E kam parë shumë rrallë. Ai doli vetëm deri në kopsht. Dy ose tre herë gjatë viteve. Jo më. Dhe më bëri përshtypje sepse ajo ishte e veshur nga lart poshtë. Si me kapuç. Nuk e pashë kurrë jashtë oborrit të shtëpisë duke lëvizur, duke bërë pazar. Dhe as që e kisha parë kurrë fëmijën”.

Gruaja 22-vjeçare erdhi në Volos në vitin 2021 pas martesës me bashkatdhetarin e saj 28-vjeçar, një burrë mizor që nuk e la kurrë të mësonte greqisht, sepse nuk e lejoi kurrë kontaktin e saj me asnjë njeri.