Ilirjan Celibashi, kryekomisioneri Shtetëror për Zgjedhjet, tha se procesi zgjedhor në Kukës nuk ka probleme në aspektin teknik, ndërsa shtoi se KZAZ ka marrë masat e duhura që mos ketë vonesa në procesin e numërimit të votave.
Sipas KQZ, deri në orën 14:00 kanë marrë pjesë në zgjedhje 28.69%, ndërsa janë raportuar të dhënat nga 43 prej 74 qendrave të votimit.
“Ata që do të shkelin ligjin do të ndëshkohen”, tha Celibashi, duke shtuar se problematikat që kanë të bëjnë me intimidimin e zgjedhësve apo shitje-blerje votash duhet të adresohen.
“Nuk them se zgjedhjet janë të shkëlqyera, por këtu në Kukës nuk kemi ende të dhëna për problematika që mund të venë në dyshim procesin”, tha Celibashi.
Ai tha se do të verifikohet çdo denoncim lidhur me sjelljen e administratës publike në zgjedhje, për të parë se sa mund të ketë ndikuar në proces dhe sa mund të jetë cënuar procesi.
Por sipas Kryekomisionerit, nga të dhënat që disponon KQZ, deri më tani nuk ka probleme që mund të cënojnë zgjedhjet në Kukës.
Discussion about this post