Policia e Tiranës ka reaguar lidhur me një ngjarje të raportuar më parë ku protagonistë ishin dy punonjës policie, njëri i Drejtorisë së Vlorës dhe tjetri efektiv i Repartit Shqiponja në Tiranë.
Ngjarja ka ndodhur në Laprakë, ku sipas raportimeve, ka pasur një përplasje fizike mes dy punonjësve të policisë, pasi oficeri i Vlorës nuk i është bindur një kërkese apo urdhëri për tu kontrolluar nga polici i Tiranës.
Por në një sqarim, Drejtoria e Policisë së Tiranës jep detaje mbi atë se çfarë ka ndodhur, duke sqaruar se tashmë veprimet do të ndiqen nga Agjensia e Mbikqyrjes Policore.
Sqarim i DVP Tiranë
Më datë 24.09.2023, në rrugën “Lord Bajron”, në Laprakë, rreth orës 12:30, shërbimet e Forcës së Posaçme “Shqiponja”, kanë konstatuar dy shtetas duke debatuar me njëri-tjetrin, dhe njëri prej të cilëve mbante një çantë, në dukje me një send në formën e armës së zjarrit.
Shërbimet e Policisë janë afruar dhe kanë kërkuar nga dy shtetasit që të identifikoheshin, por dy personat kanë refuzuar të përgjigjen, dhe kanë kundërshtuar me fjalë dhe fizikisht punonjësit e Policisë.
Ndodhur në këto rrethana, shërbimet e Policisë kanë kërkuar mbështetje dhe më pas është bërë shoqërimi i tyre në komisariat. Pas verifikimeve të kryera ka rezultuar se shtetasit quhen L. M., dhe R. M., (shtetasi R. M. është punonjës Policie në DVP Vlorë).
Për ndjekjen e mëtejshme të këtij rasti është duke kryer veprime AMP.
Discussion about this post