Shpëtim Idrizi, kreu i PDIU, ka kërkuar nga Presidenti Bajram Begaj, të mbledhë me urgjencë Këshillin e Sigurisë, në mënyrë që reagimet e Shqipërisë të jenë të koordinuara dhe në mbështetje të shtetit të Kosovës.
Kjo, pas ngjarjeje tronditëse në veriun e Kosovës, ku rreth 30 terroristë serbë janë futur në territor, duke lënë të vrarë një polic dhe duke plagosur një tjetër anëtar të Policisë së Kosovës.
Idrizi, përmes një postimi në rrjetet sociale, shprehet se ngjarjet e ditës së sotme në veri të Kosovës po trondisin gjithë opinionin shqiptar.
“PDIU dënon me forcë sulmin terrorist në Kosovë ku mbeti i vrarë një pjesëtar dhe u plagos një tjetër anëtar i policisë së Kosovës”, shton ai.
Policia e Kosovës zyrtarisht ka deklaruar eliminimin e tre terroristëve dhe katër persona të tjerë të përfshirë janë arrestuar, kur pjesa më e madhe e grupit vijojnë të jenë nën rrethim nga forcat kosovare në Banjskë.
Discussion about this post