Tre persona kanë mbetur të plagosur si pasojë e të shtënave me breshëri automatike në ngjarjen e ndodhur në qendër të qytetit të Rrëshenit.
Objektiv i atentatit ka qenë 60-vjeçari Martin Bardhi, i cili ka humbur jetën në vendin e ngjarjes. Ndërkohë të plagosurit raportohet se kanë qenë të afërsi të vendit ku ndodhej viktima.
Në njoftimin zyrtar të Policisë lidhur me ngjarjen thuhet se “nga shtetas ende të paidentifikuar, u vra me armë zjarri shtetasi M. M. (B.). Ju informojmë se si pasojë e të shtënave, kanë mbetur të plagosur me armë zjarri, shtetasit I. B., I. B. dhe O. Gj., të cilët kanë qenë në afërsi të vendit ku ka ndodhur ngjarja dhe janë transportuar në spital, për të marrë ndihmën mjekësore”.
Nga të dhënat paraprake dyshohet se në ekzekutimin e Bardhit kanë marrë pjesë të paktën dy persona, ndërsa automjeti tip Jeep, me ngjyrë të errët, është gjetur i djegur rreth 12 km larg vendit të ngjarjes.
Policia ka ngritur postoblloqe në pikat hyrëse dhe dalëse dhe akset nacionale, ndërkohë që po mbledh pamjet nga kamerat e sigurisë për të bërë të mundur identifikimin e autorëve. Gjithshtu po mbledh dëshmi nga persona që janë ndodhur në vendin e ngjarjes, ndërsa pista kryesore ku po hetohet është ajo e hakmarrjes.
Discussion about this post