Automjete të vjedhura në Itali, Çeki e Gjermani, policia i bllokon në kufi (VIDEO)

Policia Kufitare ka bllokuar 3 automjete, që rezultuan të vjedhura në Gjermani, Çeki e Itali.

Automjetet janë bllokuar në pikën e Kalimit Kufitar të Morinës dhe Portin e Durrësit.

Sipas njoftimit zyrtar nga Policia, në Morinë është tentuar të futen në territorin shqiptar, përmes një karotreci, nga një shtetas i Kosovës, dy automjete që rezultuan të vjedhura në Çeki dhe në Gjermani. Makinat e bllokuara janë të tipit BMË X5 dhe Mercedez Benz.

Ndërkohë në Portin e Durrësit është bllokuar një automjet, i cili pas kontrollit rezultoi i vjedhur në Itali. Automjeti në fjalë ishte një Audi A4.
Policia njoftoi se gjatë këtij muaji ka bllokuar në Pikat e Kalimit Kufitar 5 automjete, për tentativa për trafikim.

“Në kuadër të punës intensive, nga shërbimet e Policisë Kufitare, në të gjitha pkk-të e vendit, me qëllim parandalimin dhe goditjen e krimeve kufitare, si dhe për t’iu ofruar shërbim korrekt dhe të shpejtë, qytetarëve, në hyrje/dalje, është iniciuar një plan operacional policor, me fokus parandalimin e trafikimit në vendin tonë/nga vendi ynë, të automjeteve të vjedhura.

Si rezultat i zbatimit të këtij plani operacional, në bashkëpunim me drejtoritë vendore të Policisë, në PKK Morinë dhe në PKK Port, Durrës, në hyrje të vendit, u konstatuan dhe u goditën 2 raste të kësaj paligjshmërie”, njoftoi Policia.