Klodiana Vefa, 35 vjeçe, u ekzekutua me një plumb në kokë, ndërsa policia italiane ka shpallur në kërkim bashkëshortin e saj, Alfredin 45 vjeç.
Referuar raportimeve krimi ka ndodhur pas një sherri që viktima pati me bashkëshortin e saj, me të cilin ishin në prag divorci, për shkak të xhelozive që Alfredi kishte ndaj Klodianës.
E ndërsa mediat italiane raportojnë detaje të ndryshme lidhur me ngjarjen, por edhe me jetën e çiftit që kishte dy fëmijë, një djalë dhe një vajzë, një tjetër dëshmi zbardh më shumë misterin mbi atë se çfarë ka ndodhur.
LaPresse ka publikuar dëshminë e shoqes së Klodianës. Ajo jeton në Castelfiorentino, në provincën e Firences, ndërsa pohon se “Alfredi ushtronte dhunë të fortë fizike dhe psikologjike”.
“Ajo ishte gjithmonë me humor dhe buzëqeshur, por ndryshoi plotësisht pas problemeve që i shkaktonte bashkëshorti.
Ai njeri ishte vërtet i frikshëm, por Klodiana nuk e denoncoi kurrë atë dhe kjo zgjati për një kohë të gjatë. Nuk e di pse pranoi ta takonte, këtë nuk duhet ta bënte kurrë.
Ai kishte filluar një jetë të re, kishte një grua tjetër. Nuk e kuptoj se çfarë e shtyu ta bënte këtë krim, ishte një ekzekutim. Ata fëmijë mbetën vetëm, si do të mbijetojnë nga kjo traumë”, komentoi më tej shoqja e shqiptares se vrarë.
Klodiana Vefa, 35 vjeçe, me origjinë shqiptare kishte studiuar në Institutin e Lartë F. Enriques.
Vefa kishte dy fëmijë, të mitur me të cilët ndante shpesh herë foto në rrjetet sociale. Sipas disa gazetave lokale, trupi i gruas së pajetë në rrugë është gjetur nga fëmijët e saj. Kërkimi për bashkëshortin e Klodiana Vefës vijon ende.
Klodiana Vefa punonte si kameriere në një restorant jo shumë larg vendit ku u vra. Sipas informacioneve të mbledhura deri më tani, duket se gruaja, nënë e dy djemve 17 dhe 14 vjeç, u vra nga të shtënat me armë zjarri në rrugë, në via Galvani, një fshat në Puppino. Tre të shtëna janë raportuar nga policia në vendin e krimit. Burri që ka qëlluar është arratisur menjëherë me makinën e tij.
Discussion about this post